BAUKAU, STLTIMORLESTE.com – Deskonfia projetu reabilita eskritoriu unidade ida kompostu sala ida no kuartu rua iha Eskola Sekundaria Jeral (ESJ) 01 Tirilolo Buakau seidauk entrega, tanba iha problema administrasaun balun.
Diretor Servisu Edukasaun Munisipiu Baukau, Afonso dos Santos da Costa hateten, projetu reabilita eskritoriu ba ESJ 01 Tirilolo inklui ho programa Projetu Konstrusaun no Reabilitasaun Infraestrutura Edukativu (PKRIE) neebe implementa iha tinan 2023 ba Munisipiu Baukau, kuaze balun entrega ona, tanba prosesu administrasaun rezolvidu no balun lao tarde iha progresu fiziku, tanba kondisaun iklima difikulta transporte fornese material konstrusaun, maibe daudaun kontinua lao.
“Edifisiu ESJ 01 Tirilolo hotu ona, maibe tanba falta administrasaun entre grupu ho tekniku sira nomos fornesedor material sira nee mak administrativa sira seidauk koordena didiak, entaun ida nee mak seidauk entrega,” hateten Afonso dos Santos da Costa ba STL iha semana nee.
Diretor nee sublina, problema administrasaun neebe seidauk los, tanba seidauk halo pagamentu dividas ba kompanhia fornesedor material konstrusaun nian no seluk tan.
“Projetu nee ita nia profesores sira mak jere, maibe seidauk iha esperiensia entaun nee difikulta,” nia katak
Prezidente grupu komunitariu neebe jere projetu reabilitasaun eskritoriu iha ESJ 01 Tirilolo nuudar responsavel masimu iha ESJ 01 Tirilolo hodi implementa projetu refere iha tinan 2023, maibe laiha konhesimentu jere projetu, tanba nee fo impaktu mezmu reabilitasaun eskritoriu remata ona, maibe seidauk entrega, tanba seidauk halo pagamentu dividas ba kompanhia fornesedor material konstrusaun.
“Nee bolu oinsa ita la hatene, maibe iha investigasaun mak ita foin hatene, maibe pasti iha solusaun,” Afonso dos Santos da Costa argumentu.
Diretor Servisu Edukasaun Munisipiu Baukau nee fiar, tempu besik projetu refere grupu komunitariu neebe jere projetu sei entrega ba eskola hodi utiliza, tanba Edukasaun Munisipal halo ona enkontru ho grupu komunitariu sei fo solusaun.
No tuir informasaun neebe STL asesu Prezidente grupu komunitariu ba projetu reabilita eskritoriu iha ESJ 01 Tirilolo mak inisial J.C.D.S no tezoreiru grupu komunitariu insial H, maibe STL seidauk halo konfirmasaun, tanba seidauk hetan paradeiru no projetu refere fornesedor material konstrusaun husi loja Manudare.
(tom)
