BAUKAU, STLTIMORLESTE.com – Grupu komunitariu implementa Projetu Konstrusaun no Reabilitasaun Infraestrutura Edukativu (PKRIE) iha Eskola Sekundaria Jeral (ESJ) 01 Tirilolo Baukau, sei deve kompanhia Manudare ho valor orsamentu US$ 17,592.74 ba projetu reabilita eskritoriu liu husi fornesimentu material konstrusaun.
Diretor Kompanhia Manudare, Hélio Francisco da Costa esplika, projetu reabilitasaun eskritoriu ida iha ESJ 01 Tirilolo, finansia husi Ministeriu Edukasaun no implementa husi grupu komunitariu neebe lidera husi Prezidente grupu komunitariu inisial J.C.D.S, mak halo levantamentu material espesefikadu ba konstrusaun iha Kompanhia Manudare, maibe parte kompanhia tenke fornese material espesefikadu tuir padraun neebe ekipa tekniku Nasional prepara ona.
Nunee kompanhia konsege fornese material espesefikadu ba konstrusaun tuir padraun neebe ekipa Nasional prepara hanesan sementi, keramik, tinta, plafond, ranka plafond, kakuluk, kuda-kuda no seluk tan husi inisiu too projetu reabilitasaun eskritoriu remata, maibe hafoin projetu remata seidauk halo pagamentu.
“Sasan nee ita bele dehan sira halo penipuan ida ba hau nia loja, tanba sira foti material iha nee, dezde progresu foin hahu husi 0 too obra nee remata, maibe sira la selu nia dividas, total orsamentu bazeia ba nota iha nee US$ 17,592.74,” hateten Hélio ba jornalista sira iha Tirilolo, Baukau, Kinta (24/04/2025).
Nia sublina, parte grupu komunitariu ba projetu reabilitasaun eskritoriu iha ESJ 01 Tirilolo hahu foti material espesefikadu ba konstrusaun iha kompanhia Manudare entre fulan Setembru-Outumbru no Novembru 2023 too projetu reabilita eskritoriu finaliza, tanba kompanhia garante fornese material konstrusaun ho rapida, maibe too projetu finaliza la halo pagamentu ba dividas neebe iha.
Nunee iha loron 06 Maiu 2024, parte kompanhia fo ona pedidu pagamentu ba Prezidente grupu komunitariu PKRIE inisial J.C.D.S iha ESJ 01 Tirilolo inklui Diretor Nasional Infraestrutura Edukativa no Servisu Edukasaun Munisipiu Baukau, maibe kontinua seidauk iha responde ba dividas neebe iha.
“Enjineiru Edukasaun Nasional nia naran Sr. Eli, tuir informasaun katak nia mak sempre asina pagamentu iha Banku BNCTL ba grupu sira, nee mak hateten ba hau katak atu selu iha fulan Marsu liu ba, mak hau tenta kontaktu ho Enjineiru nee rasik, maibe laiha resposta atu selu,” Hélio akresenta.
Nia deklara, projetu reabilita eskritoriu iha ESJ 01 Tirilolo parte grupu komunitariu no Ministeriu Edukasaun mak selebra kontratu ho metodu, Ministeriu Edukasaun la direita selu dividas ba material neebe kompanhia fornese, maibe orsamentu transfere liu husi grupu komunitariu hafoin grupu komunitariu selu dividas ba material neebe kompanhia fornese, tanba nee parte kompanhia halo kontaktu direita ho parte tekniku Edukasaun Nasional no hatan selu dividas neebe iha, atu akontese iha fulan Marsu 2025, maibe kontinua seidauk iha rezultadu.
Tanba nee parte kompanhia sei aprezenta keixa ba Defensoria Publika no Polisia Sientifiku Investigasaun Kriminal (PSIK) hodi loke prosesu investigasaun ba projetu reabilitasaun eskritoriu iha ESJ 01 Tirilolo.
(tom)
