DILI, STLTIMORLESTE.com – Daudaun nee projetu estrada neebe lao iha Aimutin nee projetu emerjensia, maibe too agora seidauk remata.
Lia hirak nee hatoo husi Prezidente Komisaun E trata asuntu Infrastrutura, Deputadu Marcos Xavier katak, bairu barak iha Dili laran mak estrada sei aat, maibe taka ona ho alkatraun hotu ona, balu on goin hela.
“Hanesan mos obra iha Aimutin ida nee lento, maibe komisaun E bolu atensaun ona bá Ministru Obras Publiku, Samuel Marçal atu oinsa aselera lalais obra refere”, katak Prezidente Komisaun E iha Parlamentu Nasional (PN), Marcos Xavier ba Jornalista sira, Kuarta (11/12/2024).
Nia dehan, konstrusaun estrada Aimutin lao tarde tanba nia falhansu mak husi enjineiru sira, kompanhia nia ekipamentu sufisiente hela, mas falha nee parese husi enjineiru sira.
Nunee mos tanba dezenhu nee la klaru, sira halo tiha mak foin halo kontratu, depois mak foin dezenu. Lo-loos nee sira implementa iha dezenhu neebe temporariu bele halo, maibe obra nee emerjensia, tanba nee enjineiru halo tuir sira nia hakarak.
“Bainhira ADN ho Obras Publiku nia tekniku sira ba haree nota katak iha mudansa buat barak, no haree katak iha area Aimutin nee populasaun barak mak hela iha estrada ibun, uma barak mak Estadu tenke rekompensasaun ba sira, ho ida nee demora oituan”, tenik nia.
Tuir nia haree katak, semana ida nee sira aselera ona konstrusaun nee. Kompanhia iha finanseiru, maibé falta linha koordenasaun entre Estadu ho Kompanhia ladún kontrola masimu, nunee halo obra nee atraza tiha.
Obra nee kategoria emerjensia, entaun tenke lais, emerjensia labele hanesan obra mai ho tenderizasaun normál.
Nia garante molok fulan Dezembru nee remata, bele finaliza ona estrada ida nee.
Entretantu Observasaun STL haree katak, daudaun nee konstrusaun ba estrada Aimutin sei lao namanas hela.
(gui)
