BAUKAU, STLTIMORLESTE.com – Projetu reabilitasaun estrada husi Suku Abafala, Postu Administrativu Kelikai Antigu too iha Suku Nareka, Postu Administrativu Ossu, Munisipiu Vikeke, iha area Postu Administrativu Kelikai Munisipiu Baukau neebe alkatraun nahe’e ona laiha kualidade, tanba hahu nakfera.
Administrador Postu Administrativu Kelikai, Paul Jacinto Moreira esplika, projetu refere responsabiliza husi kompanhia Chongqing International Construction
Cooperation neebe hahu implementa projetu iha tinan 2023 too ohin loron seidauk finaliza.
“Hau hanoin reabilitasaun estrada husi Uaiaka ba too Ossu, prosesu aspal too ona iha Darlata, mais ita haree ba laiha kualidade, tanba aspal neebe ita haree la too lima senti nakfera mak barak,” hateten Administrador Postu Kelikai, Paul Jacinto Moreira ba jornalista sira iha Kelikai, Domingu (18/05/2025).
Nia sublina, kompanhia responsabiliza ba projetu refere nahe alkatraun iha tinan 2024 hahu husi Aldeia Laumata, Suku Abafala too iha area Darlara Postu Kelikai no too inisiu tinan 2025 komesa nakfera too ohin loron kontinua.
Nia fundamenta, mezmu alkatraun neebe kompanhia nahe’e, maibe nakfera, parte kompanhia esforsu kee sai hikas area sira neebe nakfera hodi prienxe hikas fatuk no rai hein kontinua nahe’e hikas fali, maibe sei la garantia, tanba alkatraun neebe kompanhia nahe’e tuir tekniku mahar la too sentimu lima.
“Ita husu estrada nee tenke kualidade, tanba uza osan Estadu, mais laiha kualidade mos hanesan la halo estrada, aspal neebe nahe’e nia mahar la too lima senti, kareta boot neebe mak tula sasan todan sama la too semana nakfera, tanba laiha kualidade,” Paul Jacinto Moreira akresenta.
Nia realsa, durante identifika alkatraun neebe kompanhia nahe’e, maibe la too fulan kauze parte balun nakfera, parte Autoridade Postu diriji ona karta pedidu ba Ministeriu Obras Publikas (MOP) atu destaka tenkinu iha Postu hodi akompanha prosesu reabilita estrada Kelikai-Ossu, maibe too ohin loron seidauk iha tekniku hodi akompanha.
“Husu ba Ministeriu Obras Publikas haruka tekniku mai monitoring beibeik, atu nunee nia kualidade nee iha, tanba gasta deit orsamentu estrada nee hotu mos dala ruma la utiliza,” Paul Jacinto Moreira sujere.
Entretantu projetu refere implementa husi Postu Kelikai too Ossu ho distansia kilometru 22.7 no luan metru 7, kompostu husi asfaltu metru 4, alargamentu metru 1 no ombru metru 2, moru protesaun, sinal tranzitu no kuda ai-oan ba fatin risku no projetu refere implementa husi kompania Chongqing Internasional Constraction ho total orsamentu hamutuk milhaun US$ 16.5.
(tom)
