BAUKAU, STLTIMORLESTE.com – Projetu reabilitasaun estrada Laga-Baguia kontinua lao hela. Progresu haree tarde, tanba kompanhia menus ekipamentus hodi aselera servisu. Informa Administrador Postu Administrativu Baguia, Mario Xavier da Silva ba STL iha Vila Nova, Baukau, Tersa (29/4/2025).
“Informasaun katak, kompanhia abandona servisu nee laloos, tanba sira agora servisu namanas hela. Sira halo pelebaran dalan, agora too ona Samalari,” hateten Mario Xavier da Silva
Prosesu reabilita estrada nee, kompanhia nahe ona alkatraun husi Laga Vila too area Larifanu, Suku Libagua (Postu Laga). Balu iha kondisaun ateru hodi kontinua nahe alkatraun. Kompanhia kreze fiziku too area Terloidae, maibe trabalhador sira nafatin esforsu servisu, hanesan hada bronjong, konstrui valeta, barajen no seluk tan. Agora too ona area Suku Aterali, baliza Suku Lavateri, Postu Baguia.
Parte kompanhia mos kontinua halo limpeza husi Suku Lavateri too Suku Samalari, Postu Baguia. Halo servisu hanesan kee valeta no seluk hodi kontinua konstrui barajen, valeta, hada’a bronjon no seluk tan neebe nesesita kompleta projetu reabilitasaun estrada refere.
“Ita koalia kona-ba durasaun kompanhia servisu tinan rua, maibe tinan rua liu ona seidauk remata, ita bele koalia katak menus duni ekipamentus iha terenu para halo servisu,” akresenta Mario Xavier da Silva.
Reabilita estrada Laga-Baguia tarde, laremata tuir kontratu neebe governu no kompanhia selebra. Autoridade Postu submete ona karta ba MOP para fo hanoin ba kompanhia atu aselera servisu, maibe progresu iha terenu haree lao lentu.
“Ita nafatin rekomenda ba ministeiru kompetente para bele haree kona-ba asuntu nee, liu liu sira kompanhia bele aumenta tan ekipamentus pezadu tan para bele aselera servisu diak liu tan,” Mario Xavier da Silva rekometan
Mezmu progresu reabilita estrada Laga-Baguia lao tarde, maibe bele fasilita ona movimentu transporte husi Baguia ba Baukau Vila no Baukau Vila ba Baguia, tanba kompanhia kuaze normaliza ona dalan grave sira liu husi ateru.
Nia rekomenda nafatin ba MOP atu buka solusaun liu husi koordena ho kompanhia bele aumenta liu tan ekipamentus pezadu hodi aselera servisu reabilita estrada.
(tom)
