BAUKAU, STLTIMORLESTE.com – Projetu reabilitasaun estrada diresaun Postu Administrativu Uatulari ba Laisorulai, Postu Administrativu Matebian, Munisipiu Baukau lao hela, maibe mosu preokupasaun, tanba impede husi kompanhia lokal balun, maibe rezolve ona.
Prezidente Autoridade Munisipiu Vikeke, Francisco C.S de Gonzaga Soares esplika, projetu reabilitasaun estrada dirasaun Uatilari-Laisorulai implementa iha tinan 2024 neebe responsabiliza kompanhia internasional ida no daudaun kontinua iha faze servisu, maibe antes nee hetan impedimentu husi kompanhia lokal balun.
“Nia progresu ita haree iha problema oituan, tanba kompanhia lokal mak halo impedimentu oituan, maibe iha ona solusaun rezolve iha nasional,” hateten Francisco ba jornalista STL liu husi telefone, Sesta (04/07/2025).
Autoridade Munisipiu Vikeke nee sublina, kestaun kompanhia lokal balun neebe halo impedimentu ba projetu refere, Autoridade Munisipiu la hatene kauza ruma, maibe liu husi esforsu Ministeriu Obras Publikas rezolve ona iha Nasional no daudaun servisu iha terenu kontinua lao.
Francisco argumentu, hanesan reprezentante Governu Sentral iha Munisipiu kontinua kolabora ho parte kompanhia implementador projetu refere nunee bele iha progresu diak hodi fo asesu ba interese publiku, tanba komunidade iha baze prezisa dezenvolvimentu, nunee garante projetu refere sei finaliza.
“Estrada ligasaun husi Baukau Kelikai ho Uatulari agora sei lao hela, projetu kompanhia boot mak kaer nee ba ita laran metin bele rezolve, ita hein deit akompanhia nia progresu,” Francisco akresenta.
Entretantu tuir nota informativu neebe STL asesu husi Agência Noticiosa de Timor-Leste, projetu reabilitasaun estrada husi Uatulari too Laisorulai ho distansia Km 22 responsabiliza husi kompanhia Shanghai Construction neebe Ministeriu Obras Publikas kontatu ho valor orsamentu US$ 18,462,610.14 ba durasaun servisu fulan 18 neebe hahu husi loron 04 Outumbru 2024 no sei termina iha loron 03 Abril 2026.
(tom)
