BAUKAU, STLTIMORLESTE.com – Kompanhia responsabiliza ba projetu reabilitasaun estrada urbana Baukau Vila iha pakote II nian seidauk halao servisu.
Veteranu Fernando “Beredu’u” Gusmão esplika, iha loron 06 Fevereiru 2026 Governu liu husi Ministeriu Obras Publikas (MOP) selebra ona kontratu ho kompanhia implementador rua ba projetu reabilitasaun estrada urbana Baukau Vila, maibe husi kompanhia rua neebe Governu kontratu, hanesan kompanhia JOVA Construction Unipessoal Lda halao ona servisu alargamentu no ateru ba estrada husi area Nagardjo Suku Bahu tuir planu too iha area rotunda Vila Nova.
Enkuantu kompanhia seluk neebe responsabiliza husi area rotunda Vila Nova too iha area Suku Tirilolo seidauk halao servisu no mobilizasaun pezadu iha terrenu.
“Jova hahu ona Jony Z sei para hau husu Ministeriu Obras Publikas hatete ba kompanhia sira servisu, hodi bainhira ami enkontru hau koalia mai iha bundaran ida sae ba terminal ida tun ba Uatelete labele sorin lao sorin para fali nee la dun diak ida. Kuandu fulan ida marsu nee mak la lao nee mak ita koalia, maibe hau konfia sei lao,” Veteranu Fernando “Beredu’u” Gusmão hateten ba jornalista sira iha Vila Nova Baukau, Kuarta (04/03/2026).
Mezmu kompanhia manan nain ba projetu reabilitasaun estrada urbana Baukau Vila seidauk halao servisu ruma iha terrenu, maibe garante sei implementa projetu refere, tanba kompanhia refere iha ekipamentus no finanseiru atu jere projetu refere.
Maibe Beredu’u prepkupa ho kompanhia JOVA Construction Unipessoal Lda neebe hafoin selebra kontratu halo ona servisu alargamentu no ateru rai ba estrada diresaun husi area Nagardjo too area Hospital Rejional Eduardo Ximenes (HoREX) Baukau, daudaun nee paradu.
“Sira servisu halo tiha ona, maibe horseik hau rona informasaun ida dehan servisu agora para, nee mak hau dehan ba kompanhia nee servisu lao nafatin se mak dehan atu para,” Beredu’u informa.
Hatan ba kestaun nee Koordenador Tekniku Obras Publikas Destakadu Munisipiu Baukau, Diego Cipriano Caleza rekonhese, Ministeriu Obras Publikas selebra ona kontratu ho kompanhia rua ba iha projetu reabilitasaun estrada urbana Baukau Vila neebe daudaun kompanhia JOVA Construction Unipessoal Lda halao ona servisu iha terrenu, tanba diresaun estrada neebe kompanhia JOVA responsabiliza laiha komunidade afetadu enkuantu kompanhia responsabiliza ba pakote II seidauk implementa, tanba lokal servisu iha komunidade afetadu, nunee sei hein ordem servisu husi Ministeriu.
“Sira labele lao tanba iha mos regras ida simu tiha lai ordem trabalho, ordem trabalho sai iha dia 26 Fevereiru foin lalais nee entaun prosedimentu legal tenke iha tiha lai ordem trabalho mak foin servisu, tanba empreza segundu nee kona loos iha vila laran, neebe hau hanoin molok sira servisu halo uluk lai identifikasaun public utility sira nee, tanba ida nee alargamentu afeta ba buat ruma,” Diego esplika.
Nia informa, prosesu identifikasaun ba afetadu estrada urbana iha diresaun pakote II nian, ekipa Obras Publikas husi nasional sei destaka iha Baukau loron 05 Marsu nee hodi identifika afetadu sira hafoin kompanhia servisu, tanba estrada refere sei alarga ba metru 17 neebe possibilidade iha afetadu barak.
Diego rejeita kona-ba parte kompanhia JOVA Construction Unipessoal Lda neebe katak servisu paradu nee laloos, tanba servisu lao hela, maibe iha estrada balu prezisa hetan aprovasaun tuir prosedimentu legal neebe prezisa halo teste iha laboratorium Ministeriu Obras Publikas Nasional, tanba projetu reabilitasaun estrada urbana Baukau Vila prezisa iha kualidade servisu neebe diak.
Entretantu alagramentu iha projetu reabilitasaun estrada urbana Baukau Vila ho luan metru 17 husi area Nagardjo too Tirilolo, tanba halo estrada diresaun 2 parte klaran konstrui jardim estrada sorin sorin estabelese trotoar ba ema lao ain. No projetu nee responsabiliza husi kompanhia JOVA Construction Unipessoal Lda no Vage’el Unipessoal Lda.
(tom)
