BAUKAU, STLTIMORLESTE.com – Projetu konstrusaun edifisiu Pre-Eskolar iha Suku Kaibada, Postu Administrativu Baukau Vila, Munisipiu Baukau, finaliza ona.
Xefe Suku Kaibada Cosme da Costa Lopes hateten, konstrusaun edifisiu Pre-Eskolar iha Kaibada implementa husi kompanhia lokal One-4 All Unipesoal Lda ho valor orsamentu US$ 99,757.52, koresponde ba konstrusaun sala prosesu aprendizajem 2 no edifisiu profesores 1 neebe hahu konstrusaun iha fulan Outubru 2024 no remata ona, iha fulan hirak liu ba, maibe too ohin loron seidauk entrega.
“Konstrusaun Pre-Eskolar nian remata ona so que nia prosesu mak seidauk entrega ba alunu sira atu utiliza, entaun autoridade nia preokupasaun mak nee agora daudaun ita nia oan pre-eskolar sira banku la sufisiente balu nahe biti tur, agora tempu udan nia afeitasaun ba fali ita nia oan sira, entaun ezije ba edukasaun nasional atu nunee bele entrega ona,” hateten Cosme ba jornalista sira, iha Kaibada Uaimua, Segunda (01/12/2025).
Nia rekonhese, projetu konstrusaun refere fizikamente atinji ona 100%, maibe seidauk entrega ba parte eskola atu utiliza, tanba iha asesoria balu hanesan meza no kadeira seidauk kompleta.
Tanba nee husu ba Ministeriu Edukasaun atu aselera prosesu kompleta meza no kadeira estudante nian, nunee iha anu letivu 2026 estudante sira bele utiliza ona sala refere.
“Hau hanoin sira esforsu iha fulan ida nee para tinan oin ita bele utiliza, se tinan oin mak nafatin deit hanesan nee ami Autoridade foti dezisaun bele koloka ona ita nia alin sira ho sira nia manorin nain sira sira bele mai utiliza fatin, depois sira ekipa nasional lori meza kadeira sira lori ikus mai, mais provizoriu sira bele uza ona,” Cosme katak.
Tuir Autoridade nee katak, durante ezistensia pre-eskolar Kaibada Uaimua laiha edifisiu permanente, tanba nee Ministeriu Edukasaun aloka orsamentu hodi kompanhia manan nain implementa projetu refere no finaliza ona atu fasilita estudante sira, maibe bainhira parte edukasaun nasional la aselera mobiliza meza kadeira iha tinan nee, Autoridade Suku sei orienta parte eskola hodi utiliza edifisiu foun refere iha anu letivu 2026.
Liga asuntu nee STL tenta konfirma Diretor Servisu Munisipal Edukasaun Baukau, maibe laiha fatin atu fo komentariu, tanba halao hela servisu iha fatin seluk.
Jornalista: Tomas Reis
Editora: Carme Ximenes
