BAUKAU, STLTIMORLESTE.com – Projetu moru protesaun neebe implementa iha mota Suku Samalari, Postu Administrativu Baukau Vila, Munisipiu Baukau, laiha numeru kontratu.
Projetu nee ho distasia kilometru 2+306 hahu husi area Larubi too abrigu Komadante FALINTIL David Alex no jornalista Max Sthal nia subar fatin, responsabiliza husi kompanhia joint venture kompostu kompanhia Arquiris Unip.Lda no Mauco’o Construction Lda ho valor orsamentu hamutuk US$ 3,966,308.35.
Nain ba kompanha Mauco’o Construction, Satornino da Costa Belo hateten, projetu refere tipu emerjensia no kompanhia implementa, tanba oriente husi Ministru Planeiamentu Investimentu Estratejiku, maibe too ohin loron laiha numeru kontratu ba projetu refere.
“Projetu nee Ministru Gastão mak haruka, numeru kontratu seidauk iha seidauk fo pagamentu,” Satornino ba STL liu husi telefone, Tersa (21/10/2025).
Projetu nee hahu implementa iha inisiu tinan 2025 too fulan Maiu tinan nee progresu fiziku atinji ona 50% no daudaun progresu fiziku krese ona 70%, maibe parte Governu seidauk fo pagamentu balu ba projetu refere, tanba razaun projetu refere laiha numeru kontratu.
Diretor Kompanhia Mauco’o nee katak, relasiona projetu nee neebe implementa laiha numeru kontratu, parte kompanhia esforsu halo ona konfirmasaun ho parte relevante sira ,atu fo numeru kontratu ba projetu refere, maibe too ohin loron nafatin seidauk iha rezultadu.
“Projetu nee Prezidente KAFI, Gastão Sousa asina hotu ona Obras mak la fo kontratu, entaun ami husu para sira fo numeru kontratu para ami aselera lalais asegura komunidade nia uma no natar,” Satornino sujere.
Nain ba kompanhia nee katak, projetu refere implementa ho tipu emerjensia no hetan, orienta husi Ministru Planeiamentu Investimentu Estratejiku daudaun nafatin implementa mezmu nunee kontratu seidauk iha, tanba hakarak asegura uma komunidade no natar sira iha Suku Samalari neebe dadaun mota fo ameasa.
Jornalista: Tomas
Editora: Carme Ximenes
