BAUKAU, STLTIMORLESTE.com – Projetu reabilitasaun estrada kontinuasaun husi area Kairavela Postu Administrativu Vemasi liga Kaisidu too Aeroportu Lanud Baukau atinji ona 47.5%.
Koordenador Tekniku Kompanhia DVP Konstrusaun Unipesoal Lda, Cesaltino da Silva esplika, projetu reabilitasaun estrada kontinuasaun husi area Kairavela Postu Vemasi too Aeroportu Ladun Baukau distansia kilometru ualu (8) resin fahe ba pakote rua, pakote dahuluk distansia kilometru lima (5) responsabiliza husi kompanhia DVP Konstrusaun Unipesoal Lda no pakote daruak responsabiliza husi kompanhia Central Hill ho distansia kilometru tolu (3) resin.
Projetu reabilitasaun refere ho kontratu durasaun tinan ida neebe hahu servisu iha loron 17 Janeiru 2025 no sei termina inisiu tinan 2026, maibe too segundu semana fulan Junhu nee husi pakote rua atinji ona 47.5%, tanba kompanhia emprega trabalhadores lokal besik 600.
“Servisu nee pakote rua, pakote primeiru kontraktor DVP too dia 13 nee nia progresu 22.5%, no pakote daruak Central Hill 25% ona,” Cesaltino informa ba jornalista sira iha Kaisidu, Segunda nee (16/06/2025).
Nia sublina, ba progresu fiziku neebe dadaun atinji husi kilometru ida (1) too kilometru ualu (8) mak hanesan, DVP konstrui ponte ho box claver haat (4) no monta manila RCPC tolu (3) enkuantu Central Hill konstrui ponte ho box claver tolu (3) no monta manila RCPC tolu (3) neebe dadaun kuaze atu konklui no konstrusaun valeta, moru protesaun remata ona husi kilometru ida too 8.
Nia fundamenta, husi servisu monta manita, konstrui valeta, moru protesaun inklui ponte box claver neebe kuaze konklui, sei kontinua servisu ateru hodi hein implementa sabies, beiscors no faze ikus nahe alkatraun husi kilometru ida too ualu hafoin finaliza.
“Servisu sira nee komesa liga hotu ona, tuir kontratu servisu too iha rona mak tau alkatraun, entaun agora iha ona etapa servisu minor sira hotu ona, servisu tuir mai mak sabies nian, beiscors hotu tau ona alkatraun,” Celestino akresenta.
Tekniku Kompanhia DVP nee argumentu, servisu foin too iha trimestral daruak, maibe hatudu progresu diak, tanba kompanhia ho trabalhadores iha terenu halo kolaborasaun diak.
Iha sorin seluk, Diretor Kompanhia Central Hill, Aderito da Costa Correia “Domi” katak, nuudar Timor oan sei finaliza projetu refere tuir kontratu neebe selebra ona, maibe finaliza ho kualidade nunee utiliza ba tinan naruk.
“Ami sei finaliza tuir kontratu neebe iha garante kualidade, tanba nuudar Timor oan, labele hanesan estrajeiru para halo buat ida tuir nia hakarak hotu fila, maibe hanesan Timor hatudu kualidade ba nia rai,” Domi argumentu.
Komunidade Aldeia Lialai-Lesu Suku Tirilolo, Julit Manuel Belo espresa sentimentu agradese ba Governu, tanba durante tinan barak movimentu komunidade Kaisidu, Lialai-Lesu no Parlamento ho transporte publiku no privadu lori oras rua hafoin too iha estrada nasional diresaun Baukau-Dili area Aeroportu Lanud nian, maibe hafoin Governu kontratu kompanhia rua refere servisu iha terenu, dadaun estrada kondisaun sufisiente ona fasilita movimentu ema ho transporte.
“Ami agradese ba Governu ida nee, tanba tinan liu ba nunka asesu estrada, maibe agora ami asesu ona estrada. Antes nee ami ho kareta husi nee too estrada boot kuaze oras rua, maibe agora la too ona oras ami too ona iha Aeroportu nian,” hateten Julit.
Entretantu porjetu reaabilitasaun estrada Kairavela liga Kaisidu too Aeroportu Lanud-Baukau ho distansia kilometru 8 resin, neebe responsabiliza husi kompanhia DVP Konstrusaun Unipesoal Lda ba distansia kilometru lima (5) ho valor orsamentu US$ 4,386,542.91 no Central Hill Unipessoal Lda responsabiliza ba distansia liu kilometru tolu (3.240 M) ho valor orsamentu US$ 2,537,086.94.
(tom)
