BAUKAU, STLTIMORLESTE.com – Projetu reabilitasaun estrada diresaun husi Postu Administrativu Kelikai ba Postu Ossu, Munisipiu Vikeke, fo impaktu ba uma lisan hamutuk tolu (3) iha Suku Lelalai, Postu Matebian, Munisipiu Baukau, tanba ameasadu atu monu.
Administrador Postu Matebian, Domingos Pereira hateten, projetu reabilitasaun estrada husi Suku Abafala too Postu Administrativu Ossu, Munisipiu Vikeke, kuaze kontinua lao, konsege fasilita movimentu transporte publiku no privadu, maibe iha parte balun fo impaktu, tanba komunidade balun nia uma lisan ameasa atu monu.
“Foin lalais komunidade sira informa mai, uma balun hetan ameasa, iha tolu mak sira informa mai nee uma lisan deit iha Suku Lelalai,” hateten Domingos ba STL iha Vila Nova, Baukau, Tersa (22/04/2025).
Nia esplika, kauza husi uma lisan hamutuk tolu neebe ameasadu monu, tanba lokaliza iha foho leten no kompanhia responsabiliza liu husi trabalhador kuaze kee hodi alargamentu ba estrada, maibe seidauk asegura liu husi hada’a barajen hodi projete, nunee kauza husi udan boot sira afeta erozaun fo ameasa ba uma lisan sira.
Nia sublina, uma lisan hamutuk tolu neebe ameasadu, daudaun hela metru ida, husi distansia rai monu ba lokaliza uma lisan, tanba nee Autoridade Postu sei esforsu liu husi aprosimasaun ho kompanhia responsabiliza hodi asegura liu husi konstrui barajen hodi projete uma lisan refere.
“Uma lisan nee afeta besik ona metru ida, postu sei tenta hatoo ba kompanhia, se ba mak seidauk atende sei haruka karta ba ministeiru bolu atensaun,” nia fundamenta.
Autoridade Postu Matebian nee akresenta, daudaun uma lisan tolu refere ameasadu atu monu, nunee Autoridade Postu sei aprosima ho kompanhia iha tempu besik, maibe la responde sedu, sei diriji karta ba Ministeiru Obras Publikas hodi bolu atensaun ba kompanhia, tanba uma lisan nuudar identiku ba sidadaun ida neebe la autoriza hodi hetan estragus husi kualker entidades.
Aleinde nee nia agradese ba Governu, tanba bele inisia planu ba reabilita estrada dirasaun Kelikai-Ossu neebe daudaun fasilita ona komunidade sira lori produtu lokal asesu iha merkadu Munisipal no Nasional.
Maibe triste, tanba projetu reabilitasaun refere seidauk finaliza, maibe iha parte balun asfaltu neebe kompanhia nahe hahu nakfera, tanba laiha kualidade.
Nunee husu Ministeriu relevante atu fo atensaun ba kompanhia implementador, tanba orsamentu neebe gastus ba projetu refere konsidera orsamentu povu nian neebe atu fo vantajen ba komunidade iha baze, nunee implementa projetu tenke iha kualidade vale ba tinan naruk.
Entretantu projetu reabilitasaun estrada husi Postu Kelikai too Ossu ho distansia kilometru 22.7 no luan metru 7, kompostu husi asfaltu metru 4, alargamentu metru 1 no ombru metru 2, moru protesaun, sinal tranzitu no kuda ai-oan ba fatin risku no projetu refere implementa husi kompanhia Chongqing Internasional Constraction ho total orsamentu hamutuk US$ 452.122,00.
(tom)
