DILI, STLTIMORLESTE.com – Ekipa husi Komisaun Anti Korupsaun (KAK) neebe lidera husi Komisariu Adjuntu KAK, halo vizita supreza ba iha projetu Santa Kruz neebe agora seidauk termina.
Depois halo tiha observasaun remata, tuir Komisariu Adjuntu KAK, Rosario Salsinha Araujo katak, estatua sira halo hela iha Portugal seidauk mosu mai too agora, kompanhia no projetu nain esforsu hela prosesu nee lao ba oin, KAK halo nafatin nia servisu, liu-liu iha area preventiva nian, maibe potensia husi observasaun nee bele hakat ba iha represiva nian, no haree iha irregularidade.
Komisariu haruka ita mai atu justifika buat balu iha nee, hatudu hela momos dehan irregularidade boot ida mosu hela iha fatin ida nee la justu,” dehan Rozario ba jornalista sira iha Semiteriu Santa Kruz, Segunda (25/11/2024).
Nia hatete, Irregularidade primeiru kona-ba andamentu kontratu nian, tanba tarde demais la tuir nia dalan, la iha justifikasaun ruma kona-ba projetu nee, banhira mak remata.
Nia sublina, adisional aumenta hela deit, osan bele sae tan tanba kontratu inisiu US$ 1.385.389,88, maibe seidauk konta adisional neebe aumenta, bele aumenta too US$ 2 milhoes ital, ba deit projetu ida neebe han tempu naruk.
Hare husi aspetu preventiva nian haree katak, kompanhia tenke responsabiliza ba ida nee too remata, no projetu nain mos tenke responsabiliza, karik menus kontrola durante nee hakas aan, hanesan Timoroan tenke halo buat diak ba rai ida nee.
Nunee, husi observasaun sira nee sei halo relatoriu hodi entrega ba iha Komisariu.
Rozario dehan, vizita observasaun ida nee atu kontinua fali saida mak halo ona iha 2023, monitorizasaun hanesan no inspesaun hanesan ba projetu ida nee. Iha vagatura Komisariu nian, ekipa nee hola inisiativa tomak halo observasaun hodi haree andamentu prosesu tomak kona-ba projetu ida nee.
Iha fatin hanesan, Tekniku Kompanhia Bobolait, Joao Paulo Dos Reis Noronha dehan, tarde mak iha estatua nian, maibe sira hein deit desizaun.
“Tarde mak iha Estatua nian, tanba ami hein desizaun husi dono projeitu mak Ministeriu Asuntu Kombatente Libertasaun Nasional ho benefisiariu mak 12 Novembru,” dehan nia.
Nia hatutan, iha duni adisional aumenta tan osan hodi produs estatua iha Portugal, no progersu kona-ba produsaun estatus sira kompanhia hein deit.
(ter)
