DILI, STLTIMORLESTE.com – Planu Tribunal nian atu halo promosaun ba iha Juiz sira neebe servisu kleur ona, husi terseira klasse ba iha segunda klasse, no husi segunda klasse ba iha primeira klasse maibe tenke ho valor diak.
Tuir Prezidente Tribunal Rekursu, Afonso Carmona katak, atu halao promosaun sei haree husi valor neebe iha husi terseira klasse ba iha segunda klasse tenke ho valor bom, se husi segunda klasse ba iha primera klasse tenke ho valor bom ho distinsaun.
“Ita haree buat rua ida segunda ba terseira bom bele sae, segundu ba primeiru tenke bom ho distinsaun,” dehan Carmona ba jornalista sira, iha Kaikoli, Dili, Tersa (30/09/2025).
Maibe Carmona dehan, oras nee dadaun Inspetor halao hela nia servisu, tanba nee servisu inspetor nian kuandu termina ona maka hato ba iha Konselu Superior Majistaradu Judisial (KSMJ), konaba Juiz hirak maka sei halo promosaun.
Tanba kriteira ba Juiz sira atu hetan promosaun maka hanesan, Juiz sira tenke servisu tuir lei haruka, tanba avaliasaun ba Juiz sira hahu husi prosesu neebe tama iha Tribunal kada Juiz ida simu prosesu halo despaisu saida to iha desizaun final ka arkiva sei hare nia andamentu viola regra ka lae, se la viola regra nia hetan valor diak.
Iha fatin ketak, Jurista Sergio Dias Quintas dehan, atu hetan promosaun sei avalia husi Inspetor.
“Hau hare Juiz balu iha kapasidade, maibe atu hare Juiz sira atu iha kapasidade ka lae ida nee liu husi servisu Inseptoria nian, no servisu inspetoria nian maka halao avaliasaun, halo inspesaun ba sira nia prestasaun servisu, husi nee maka foin hare Juiz neebe bem kualifikadu ka lae,” dehan Jurista Sergio.
Nia hatutan, Juiz neebe bem kualifikadu bele promove iha triseira klasse bele promove ba iha segunda klasse no husi segunda klasse bele promove ba iha primera klasse, tanba nee liu husi inspetoria maka foin hatene Juiz nee iha kapasidade ka lae.
Aleinde nee, Membru Konselhu Superior Majistradu Judisial, Alexandre Corte Real dehan, tempu ona atu halo promosaun ba iha Juiz sira.
“Tempu ona atu halo promosaun ba iha Juiz sira, tanba Juiz balu servisu ho tinan naruk maibe seidauk iha promosaun ba sira nia kareira,” dehan nia.
Jornalista: Terezinha De Deus
Editora: Carme Ximenes
