DILI, STLTIMORLESTE.com – Promosaun no sosializasaun neebe halao husi pesoal saude sira bá iha komunidade nia leet ho objetivu hodi fo konhesimentu bá komunidade sira.
Parteira Petronela dos Santos husi Postu Saude Leohitu, Balibo, Munísipiu Bobonaro hatete, iha Postu saude nee kada loron Segunda sempre halo sosializasaun kona ba inan isin rua, Inan fo susu labarik idade husi 0 too fulan 59 no kolia kona ba moras raiva, dengue, ISPA no diarea. Durante sosializasaun komunidade sira rona no komprende mos ho diak.
“Iha sosializasaun nee komunidade sira rona ho diak i sira komprende ho diak. Objetivu husi ami nia atividade neebe mak atu fo konesementu bá komunidade sira,” dehan nia bá STL, Kinta (29/01/2026).
Nia katak, promosaun nee Postu nee halao mak ba iha nutrisaun nian, koalia kona ba konsumo aihan nutritivu e aihan grupo 3 mak hanesan aihan fo forsa mak batar, fos, aifarina no fehuk. Daruak Kona bá aihan fo Protesaun mak modo tahan, lakeru, tomate, senoura no aifuan, no datoluk mak aihan haburas hanesan ikan, naan, manutolun no susuben.
Nia hatutan, tanba nee importante tebes atu komunidade sira bele iha konesementu kona-ba ai-haan sira nee. Nee mak objetivu husi formasaun nee atu hasae konhesimento diak liu tan, hadia nutrisaun familia liu husi promove diversidade aihan atu asegura dieta saudavel iha familia mak hamenus malnutrisaun no evita raes badak ka stunting.
(dom)
