DILI, STLTIMORLESTE.com – Visi Primeiru Ministru, Ministru Koordenador Asuntu Sosial no Ministru Dezenvolvimentu Rural Abitasaun Komunitariu, Mariano Assanami Sabino promove floresta diversifika ekonomia azul iha Timor Leste (TL).
“Setor floresta importante tebes, tanba uluk gerilheiru sira subar iha ai-laran hodi luta ba ukun rasik aan no agora presiza promove floresta ekonomia azul hodi garante sustentabilidade ekonomia”, hatete Visi Primeiru Ministru, Ministru Koordenador Asuntu Sosial no Ministru Dezenvolvimentu Rural Abitasaun Komunitariu, Mariano Assanami Sabino liu husi nia diskursu, hafoin abertura seminariu nasional floresta iha salaun CCD Kaikoli, Sesta nee (18/07/2025).
Nia dehan, florestas nee fundamentu para atu kuidadu nafatin ita nia ilha nee ba naruk sustentavel no florestas sai baze ba ekonomia neebe verde neebe mak sustentavel no ekonimia azul laos kuidadu ai parapa, maibe importante mos atu bele hakiak kadiuk ho rekursu tasi oin-oin neebe ita dezenvolve iha tasi.
Tanba iha tasi laran no dezenvolve rekursu floresta proteje area protejida iha Parke Nasional Nino Konis Santana Lautem, Parke Nasional Kay Rala Xanana Gusmao sai hanesan istoria ida, iha mos area rezervadu Ilomar nee hotu importante atu fo anin neebe diak ba rai ida nee, nomos atu proteje ilha nee bele sustentavel nafatin ba oin.
Floresta sai hanesan kultura no identidade Timor Leste nian, presiza konserva hodi fo esperansa nune’e bele iha sustentabilidade, tanba nee mak agradese ba parseiru internasionál Uniaun Europeia, ADB, UNPD, JICA no parseiru seluk neebe durante ne’e apoiu ona Timor Leste iha setor floresta.
(joa)
