DILI, STLTIMORLESTE.com – Prezidente Tribunal Rekursu (PTR), Afonso Carmona hatete, promosaun ba Juiz sira atu ba tur iha Tribunal Rekursu (TR) no Supremu Tribunal Justisa (STJ), iha ona faze identifikasaun.
Nia dehan, koalia tiha ona Dezembru no Janeiru tama ona ba iha Komisaun nia servisu, tanba nee Parlamentu Nasional (PN) hili ona Komisaun rua, orsida Prezidente hili fali ninian ida, depois maka Prezidente halo tan Dekretu Prezidente se maka Prezidente Komisaun nee.
Maibe agora prepara hela atu too tiha fulan Dezembru buat hotu bele lao ona, tanba Prezidente husu too deit iha loron 18 fulan Maiu, tanba nee identifika ona Juiz sira.
“Indentifika ona Juiz sira se se maka promove, hau labele temi naran tanba Juiz barak, maibe ita presiza Juiz kareira nain sanulu resin tolu (13), husi liur nain tolu hamutuk nain sanulu resin neen (16), “dehan PTR, Afonso ba jornalista sira, iha Kaikoli, Dili, Kinta (18/12/2025).
Nia hatutan, numeru neebe iha nain sia (9) iha Tribunal Rekursu, nain haat ba iha Tribunal Supremu hamutuk ho nain tolu husi liur, sira nee maka sei promove ba iha neeba. Difikulta iha lei sei haree, maibe sira nia orsamentu kona-ba salariu aprova ona, tanba nee la difikulta kona-ba atu instala nee.
Maibe kona-ba Komisaun nee lei dehan iha ema nain tolu, rua husi Parlamentu Nasional, ida husi Prezidente, hein deit dekretu husi Prezidente hodi fo poder ba sira halao servisu.
Nunee mos kona-ba Instalasaun ema la temi Tribunal maibe Governu, no kona-ba Komisaun ba fali iha Parlamentu Nasional no Prezidente dRepublika, no rezultadu husi Komisaun maka lori mai iha Tribunal atu nomeia Juiz sira.
Iha fatin ketak, Jurista Sergio Dias Quintas dehan, tempu ona atu halo promosaun ba iha Juiz sira, tanba sira barak maka servisu ho tinan naruk ona.
“Sira barak servisu ho tinan naruk, iha kapasidade neebe diak, tanba nee presiza halo duni promosaun ba sira nia kareira,” dehan nia.
Jornalista: Terezinha De Deus
Editora: Carme Ximenes
