DILI, STLTIMORLESTE.com – Politika husi Governu atu promove tais nee diak, labele hatais iha semana deit, maibe presiza promove liu husi dekorasaun iha eventu boot sira.
Tuir Suru Nain, Eva Soares katak, tais mos hanesan identidade Timor Leste nia, tanba tais nee husi beiala sira uza ba kultura fetosan umane nia desde avo vizavo sira, tanba nee ohin loron Governu liu husi ministeriu neebe hakarak promove nee politika diak, maibe labele promove iha sesta liu husi hatais deit, maibe diak liu halo mos dekorasaun iha eventu boot sira.
“Ita haree politika ida husi Governu liu husi SEAK la sala husi Ministru Desportu mos hakarak promove hodi hatais tais iha kada semana, ida nee diak kapaas ona, diak liu tan uza mos tais halo dekorasaun iha eventu boot sira iha Dili laran nomos munisipiu sira nunee hatudu ba mundu katak tais mos sai hanesan identidade Timor Leste nia,” dehan Suru Nain Eva Soares ba STL iha nia knaar fatin Bairo Pite kuarta (07/01/202).
Nia mos husu Governu atu kria lei ruma nunee bele regula ema neebe kopia tais Timor Leste, no sosa mos soru nain sira nia tais.
Nia hatete, tais neebe sira soru balun faan hodi sosa hahan ba han no balun rai hodi halo ba lia, tanba iha sira nia bainhira lia kona nia oan feto sira ka fetosan ruma sira ba nuudar humane, buat neebe lori mak tais, depois mak ho sasan seluk.
“Ezemplu ami ba tuir oan feto ruma, sira nia banin mane mak mate ami ba nuudar humane lori tais mane depois mak foos fahi no sasan seluk no banin feto ami lori tais feto ida nee sai kultura ona ba ami husi parte lorosae nia,” katak nia.
Nia hatutan, sira mos promove tais bainhira halo kultura ruma ka koalia lia feto san humane ka lia mate ruma sira uza tais mak ba.
Nunee mos Governu liu husi Ministru Juventude Desportu Arte no Kultura (MJDAK), Nelyo Isaac Sarmento husu ba Funsionariu husi MJDAK no SEAK, hahu segunda ba oin tenki utiliza ona tais kada semana, no tuir serimonia ofisial sira, atu nunee bele tulun mos industria kiik sira neebe halao negosiu iha rai laran.
Ministru Nelyo Isaac Sarmento apela, iha loron 24 fulan Dezembru 2025, MJDAK aprezenta ona rezolusaun ida ba Governu hodi hasai ba instituisaun hotu-hotu tantu privadu, ONG, ho instituisaun governu sira komesa ona, semana ida hotu-hotu uza tais.
“Intensaun husi politika ida nee hodi ajuda industria kiik oan sira nee, bele hetan valor ekonomika husi politika nee, neebe hau haruka imi uza kada semana, labele mai inventa, importante mak imi iha dezena rasik ba loron tomak ida, hodi hafurak aan ho tais,” dehan Ministru.
Xefe Kaza Sivil Prezidensia Republika, Jesuina Maria Ferreira Gomes husu Governu atu kria enkuadramentu legal hodi promove tais iha eventu ofisial sira hanesan hatais tais iha serimonia hasae bandeira kada fulan no serimonia boot sira seluk tan.
Xefe Kasa Sivil dehan, Prezidente Republika promove tais makaas loos liu husi dekorasaun sira iha Palasiu Prezidensial nomos sempre uza tais ba vizita estadu no ofisial ba rai liur. Tais rejistu ona hanesan patrimoniu kultural iha UNESCO, tanba nee mak hotu-hotu tenke promove no preserva tais.
Jornalista: Emerenciana Pinto
