DILI, STLTIMORLESTE.com – Parlamentu Nasional aprova ona proposta Orsamentu Jeral Estadu (OJE) 2025 ho montante bilhaun U$S 2.617 iha jeneralidade ho votu afavor 42, abstensaun 22 no kontra 0.
Liu husi debate proposta OJE 2025 ba loron ikus iha faze jeneralidade, Deputadu sira ho IX Governu halao diskusaun durante loron 3, hahu husi loron 6 too 8 Novembru no ikus mai Deputadu sira aprova.
Bainhira halao diskusaun durante loron 3, tuir guiaun neebe iha, loron 3 ba jeneralidade, nunee ohin loron ikus. Nunee Prezidente Parlamentu Nasional (PPN), Maria Fernanda Lay fo tempu ba bankada idak-idak halao deklarasaun final ba Jeneralidade.
Hafoin remata deklarasaun final, PPN submete ba votasaun liu husi eleisaun direta.
“Rezultadu votasaun ba proposta OJE 2025 aprova ho votus afavor 42, kontra 0 no abstensaun 22, nunee proposta OJE 2025 pasa”, anunsia PPN, Maria Fernanda Lay iha PN, Dili, Sesta (08/11/2024).
Entretantu iha debate, durante loron 3 situasaun lao hakmatek, maski iha situasaun barulhu balu, tanba kestaun roo Haksolok no dada kadoras mai Timor Leste, inklui fo tempu ba Deputadu sira atu halo intervensaun, pontu de ordem no defeza de onra, maibe hetan kedas hakalma husi Prezidente Parlamentu Nasional neebe sempre intervein, hodi fo tempu ba break.
Debate proposta OJE nee lao ho situasaun neebe kalma no hakmatek. Maski iha kritiku oin-oin husi Deputadu sira, maibe reposta husi Governu ho kalma no entusiazmu.
Entretantu tuir orariu debate kontinuasaun ba espesialiddade iha loron 11 too loron 25 Novembru tinan nee.
Enkuantu tuir dadus neebe jornalista STL asesu, proposta OJE 2025 ho tema “Investimentu iha Infraestrutura Estratéjikas, Reforsu iha Ekonomia no Melhoria Bem-Estar Seidadaun sira niannee ho montante bilhaun U$S 2.618”.
(gui)
