DILI, STLTIMORLESTE.com – Relasiona ho prosesu Diretor Jeral (DJ) ida nian neebe husi Ministeriu Publiku arkiva, Komisariu Komisaun Anti Korupsaun (KAK), Rui Pereira hatete, la iha provas sufisiente atu konstitui pesoal nee sai arguidu, maibe kompetensia tomak iha Prokurador titular mak deside.
“Dokumentu ida nee keixa mos mai KAK ema halo publikasaun presiza KAK nia atensaun, KAK loke investigasaun informasaun watshap sira neebe ema partilha nee KAK hamutuk ho PSIK lori ba iha labotariu no IT haree ema seluk mak utiliza nia ID hodi partilha informasaun,” dehan Komisariu KAK, Rui Pereira ba jornalista sira iha MENEK, Dili, Tersa (18/03/2025).
Nia hatutan, projetu rua kona-ba irigasaun no kuarentina, KAK ba haree hotu la iha indisus ida hatudu ba diretor nee atu hola parte iha buat neebe ema koalia. KAK halo investigasaun hodi haree informasaun nee loos ka la loos, tanba husi parte investigasaun mak sei hatudu katak, provas nee iha ka lae atu lori ema ida ba hatan.
“Kazu nee arkiva tanba ami mos halo servisu, bolu sasin lobuk ida kargu xefia sira iha ministeriu, dokumentus rekolha hatudu katak la iha krimi ida mak hateten hanesan ema publika iha media nee, tanba nee mak ita iha konkluzaun ba Ministeriu Publiku atu haree no deside, no kompetensia nee iha Ministeriu Publiku laos KAK, tanba KAK la iha poder arkivamentu,” dehan Komisariu.
Iha fatin ketak, Defensor Publiku, Fransisco Martins deklara katak, Ministeriu Publiku arkiva prosesu nee, tanba la iha provas sufisiente.
Iha prosesu numeru 00424 KAK TL, razaun tanba saida mak Ministeriu Publiku halo arkivamentu, primeiru katak la iha indisus forte, katak RSG la iha indisus pratika krimi neebe imputa ba nia, liu-liu krimi korupsaun pasiva ajente publiku ho aktu ilisitu,” dehan Defensor Publiku.
Nia hatutan, depois KAK halo investigasaun haruka ba iha Ministeriu Publiku, no Ministeriu Publiku hanesan nain ba asaun penal deside la iha provas no la iha indisus ida neebe forte hodi kontinua prosesu nee ba oin.
(ter)
