DILI, STLTIMORLESTE.com – Prosesu sira neebe tama iha Ministeriu Publiku (MP) nia investigasaun konklui kleur, parte neebe envolve iha prosesu nee iha direitu liu husi nia asistente sira bele konfirma kona-ba andamentu prosesu iha MP.
Tuir Peskizador Legal JSMP, Luis de Olivera Sampaio katak, iha okaziaun barak rona argumentu justifikasaun husi Ministeriu Publiku, tanba sira refere ba rekursu umanu neebe menus. No loos duni kazu barak tama iha Ministeriu Publiku, maibe kazu krimi presiza dadus sufisiente atu lori ba iha Tribunal, labele ba saugati deit tanba Ministeriu Publiku defende integridade nasaun, laos kazu hotu ba Tribunal absolve deit, prejudika sira nia integridade kapasidade Instituisaun nian, tanba nee presiza tempu duni.
“Maibe los duni saida mak publiku preokupa nee sai razaun fundamentu duni, tanba iha kazu barak ita haree, se ita mak hola parte iha kazu nee, ita mos tenke iha direitu ezije prosesu nia andamentu too iha neebe, ita bele ba rasik iha Ministeriu Publiku,” dehan Luis ba jornalista STL iha Kolmera, Dili, Tersa (19/08/2025).
Tuir Luis, prosesual foun nee bele iha asistente neebe halo papel buka tuir kazu nee to iha neebe, se lae Advogadu ka Defensor sira loke dalan ba Ema atu ezije nia kauza iha neebe maka t0o agora la lao ba oin.
“Se prosesu lao kleur ezije ita nia proativu, hodi hola parte iha prosesu, tanba se ita la book an sira kontinua hanesan nee, importante ita hanesan nain ba kazu nee tenke buka hatene,” dehan nia.
Iha fatin ketak, Jurista Jose Maria Guterres dehan, prosesu balu investigasaun lao kleur, tanba dala ruma provas seidauk sufisiente.
“Hau hanoin dala ruma prosesu balu investigasaun lao kleur, tanba presiza rekolha provas atu lori prosesu ida ba iha Tribunal presiza rekolha provas sufisiente,” dehan nia.
(ter)
