DILI, STLTIMORLESTE.com – Juiza Administradora Tribunal Dili, Edite Palmira hatete, oras nee daudaun prosesu pendente iha Tribunal husi prosesu krimi barak liu kompara ho prosesu sivil.
“Juiza Administradora nia knaar sei halo mos relatoriu anual ba iha Konselhu Superior Majislatura Judisial, prosesu entrada pendente julgadu no pendente tinan kotuk nian, ida nee ami sempre halo relatoriu anual no iha prosesu krimi barak,” dehan Edite ba jornalista sira iha nia knaar fatin Kaikoli, Sesta (05/04/2025).
Nia hatutan, iha fim do mes fulan Dezembru tinan 2023 pendente hamutuk 2.402, mai iha tinan 2024 pendente sae tan iha 2.446, mai fali iha Janeiru 2025 pendente sae ba 2.606, ida nee ba iha prosesu krimi, prosesu krime laos diminui maibe sae ba beibeik.
Numeru Juiz sanulu resin rua, halo ba Koletivu haat no Koletivu ida iha Juiz nain tolu, no Koletivu nee atu julga krimi sira neebe nia kastigu iha tinan 5 ba leten.
Prosesu sivil iha tinan 2023 fulan Dezembru pendente iha 531, iha tinan 2024 sae ba 585 no iha tinan 2025 fulan Janeiru sae ba 586. No iha fulan Fevereru 571, no relatoriu neebe hatoo laos relatoriu anual deit, maibe iha mos relatoriu semanal.
Edite dehan, Tribunal oras nee daudaun iha Juiz hamutuk nain 16, no iha Juiz nain 12 ba kaer prosesu krimi no nain 4 mak kaer prosesu sivil.
Atu rezolve kestaun nee presiza aumenta numeru Juiz, no espera katak Juiz sira neebe halao hela formasaun iha Portugal sira fila mai bele integra tan iha kareira Majislatura Judisial hodi reforsa tan iha Tribunal sira.
Iha fatin ketak, Akademiku UNTL Rafael De Jesus dehan, presiZa aumenta rekursu humanus, hodi redus prosesu pendente sira.
“Presiza duni aumenta rekursu umanus hodi apoiu servisu Tribunal nian atu bele halo redusaun ba prosesu pendente sira,” dehan nia.
Nia hatutan, ohin loron ema barak kestiona kona-ba kazu sira iha Tribunal, tanba lao kleur, ida nee kauza mos husi rekursu umanus, konsidera importante duni ba futuru aumenta rekursu umanu.
(ter)
