DILI, STLTIMORLESTE.com – Prosesu kona-ba reforma ba iha funsionariu sira sei hahu iha fulan Janeiru 2026, no sei diskuti mos kona-ba funsionariu sira neebe ho kondisaun moras.
Tuir Komisariu Funsaun Publiku (KFP), Agostinho Letencio de Deus katak, agora daudaun por volta rihun 2 hanesan nee sei tama ba idade reforma iha tinan 2026.
“Lei reforma nee husi Parlamentu fo 180 dias ba Governu atu bele hahu ona prosesa ba reforma, agora daudaun ita sei halo hela diskusaun kona-ba reintegrasaun prosesu ida nee entre hela 180 dias, maibe data lo-loos ita hahu reforma nee sei tama ba iha Janeiru 2026,” dehan KFP, Agostinho ba jornalista sira iha Kaikoli, Dili, Kuarta (05/02/2025).
Nia hatutan, diskuti iha prosesu reforma nee laos haree deit ba iha funsionariu neebe idade 75, maibe haree mos ba funsionariu sira neebe moras, sei servisu ho Ministeriu Saude atu define sira nia estatutu moras. Tanba iha balu moras bele rekopera fali, no sei deside no hola parte hotu iha 180 dias iha faz diskusaun.
Hatan kona-ba aktu disiplinar ba funsionariu sira, nia parte dehan iha maibe sempre iha diferensa ba nia numeru, balu bele hetan fulan ida fulan rua tuir nia erro neebe halo. Ezemplu balu mos hetan demisaun tanba husik hela nia servisu ba halao servisu iha rai liur.
Iha fatin ketak, Akademiku Universidade Nasional Timor Lorosae (UNTL), Rafael de Jesus dehan, importante atu halao reforma ba funsionariu sira neebe ho idade boot ona, atu bele fo fali oportunidade ba foin sae sira.
“Reforma ba iha funsionariu sira neebe idade boot atu bele fo fali oportunidade ba foin sae sira, importante mak sira neebe foun halao servisu ho diak hodi dezenvolve ita nia rain,” dehan nia.
(ter)
