DILI, STLTIMORLESTE.com – Tuir Kadetes Polísia Nasional Timor Leste (PNTL) Munisipiu Baukau, Antonio da Costa Guteres hatete, luta iha prosesu rekrutamentu nee koletivu, laos nain ida mesak, maibe ikus mai barak sai vitima, povu baibain nia oan la tama lista, maibe PNTL nian oan mak nakonu iha lista neebe komisaun fo sai ona.
“Ami nia luta ida nee la signifika sai manan nain, maibe ami nia luta ida nee ami hakarak sai PNTL, ami hakarak buat neebe los no tenki justu. Tanba iha neeba sira kontra ona diploma ministerial neebe fo dalan ba rekrutamentu nee. PDHJ mos halo fiskalizasaun mosu sistema familiarizmu no nepotizmu, entaun ho ida nee ami rejista, ami la gosta injustisa, ami hakarak liu PNTL nee tenki justu ho lo-loos para servi rai ida nee,” Kadetes PNTL Foun Munisipiu Baucau, Antonio da Costa Guteres ba jornalista sira liu wanhira halao Manifestaun iha Edifisiu MI nia oin, Segunda (16/03/2026).
Iha fatin hanesan,, Portavos kadetes foun PNTL, Tito Orleans haktuir, desizaun Konselhu Ministru suspende 20 dias ninia prazu termina ona, tanba nee mak ohin halo asaun nee.
“Ohin ami nia asaun lao, tanba ami hare ba prazu suspende nee, tanba 20 dias nee termina ona, maibe tanba saida mak sira lakoi fo sai. Maibe komisaun supervizaun indentifika nain 71 polisia nia oan, no nain 72 veteranus nian oan, seraque polisia nia oan, subrino nia familia iha hotu laran, maibe sira la halo investigasaun,” nia esplika.
Nia informa, iha nee husu atu anula total, tanba ami konsiente katak, ida nee ladun satisfas ba ami mak ami halo rejisti, tanba haree katak, 71 polisia nia oan nee seidauk polisia nia alin no subrinu no familia la halo verifikasaun,” nia deklara.
Nia hatutan, molok halo asaun pasifiku nee hatoo mos karta autoridade ba PNTL hodi asegura seguransa, nomos karta reitor UNTL husu uza espasu ba asaun refere.
“Ami nia asaun nee durante fulan ida, ami sei halo enkontru ho reitor para fo espasu ida nee, aban ami sei kontinua no sei konsentra masa 10 mil ital”, esplika nia.
Aliende nee, Dekanu Fakuldade Siensia Sosial UNTL, Alarico da C. Ximenes fundamenta, laos dekanu mak la autoriza uza espasu ba asaun refere, maibe tuir regras mak la fo kbiit atu permina ba kandidatu sira atu halo asaun refere.
“Tanba iha kampus ida nee ita foin simu estudante foun, iha estudante barak iha prosesu aprendizagem persiza iha ambiente hakmatek ba profesor sira bele hanorin sira. Fakuldade mos simu karta husi reitor nee husu la permite kampus nee ba asaun refere, maibe ba estrada laiha problema”, nia dehan.
Entretantu, Komandante PNTL Munisipiu Dili, Superientende Xefe Polisia, Orlando Gomes informa, Komando Munisipiu Dili hetan orientasaun husi komando jeral no komando operasaun kona-ba kandidatu PNTL sira nia manifestasaun ninian.
“Ita prontu para apoiu asegura seguransa iha kapital Dili. Ita nia nasaun demokratiku iha liberdade nomos reuniaun atu bele halo espresaun iha publiku, maibe ita nafatin tuir lei manifestaun nian, tenki nafatin tuir regras, maske iha karta konesimentu hatama iha komando jeral, maibe nafatin labele halo manifestaun iha espasu publiku sira,” nia koalia.
Tan nee, Orlando informa, ohin komando Munisipiu Dili iha terenu hodi apoiu seguransa iha fatin refere, labele halo impedimentu ba movimentu publiku.
Nia mos husu manifestante sira kumpri nafatin tuir regras, no tuir lei no labele viola lei manifestasaun nian.
“Ohin nee iha fatin espasu publiku labele halo manifestasaun. Iha karta nee hatoo ona iha semana kotuk, maibe realidade la akontese tanba laiha enkontru ruma hodi desidi fatin ba manifestasaun nian,” nia afirma .
(jen)
