DILI, STLTIMORLESTE.com – Prokurador konsidera prosesu roo Haksolok hanesan ai-hun ida, neebe hamosu tan sanak ho nia abut.
Liafuan nee haktuir husi Prokurador Jeral Republika, Nelson de Carvalho, relasiona ho preokupasaun publiku kona ba investigasaun roo Haksolok neebe lao kleur.
“Roo Haksolok sai hanesan ai-hun ida. Ita hatene ai-hun nee sanak hira, signifika nee ita boot sira hatene ai-hun nee nia abut barak tan, signifika mosu tan prosesu balu iha roo Haksolok nee nia laran,” dehan Prokurador Jeral Republika, Nelson de Carvalho ba jornalista sira iha Edifisiu MF, Aitarak Laran, Sesta (22/08/2025).
Nia hatete, prosesu investigasaun hare ba kazu hanesan sira neebe kompleksu, lori tempu hodi rekolha faktus provas testemunha, buka buat neebe iha indikasaun ho krime, liu liu Prokurador prosesu uza maneira neebe to ikus mai bele halo akuzasaun ka arkiva.
Nia esplika, hare ba iha nia natureza krime, balu bele to tinan rua ka tolu.
Iha fatin ketak, Jurista Jose Maria Guterres dehan, prosesu hotu investigasaun lao lais ka kleur, hare ba iha natureza krimi.
“Investigasaun termina lalais ka kleur haree ba iha natureza krimi, balu kuandu provas kompletu bele konklui lalais, se provas seidauk iha kontinua investiga,” dehan nia.
Nia hatutan, investigasaun maka sai fator determinante atu lori prosesu ida ba oin ka lae, tanba nee tenke investiga ho neineik.
(ter)
