DILI, STLTIMORLESTE.com – Publiku barak kestiona ho kazu Roo Haksolok, tanba nee Prokurador deklara katak, prosesu refere rona ona ema hamutuk nain 58 nia deklarasaun.
Kazu Roo Haksolok rona ona ema hamutuk 58 mak presta ona sira nia deklarasaun,” dehan PJR ba jornalista sira iha Palasiu do Governu, depois de partisipa selebrasaun loron Proklamasaun Independensia Unilateral ba dala-50, Sesta (28/11/2025).
Hatan kona-ba deskonfia envolve eis titular balu, PJR dehan ida nee kestaun ema pesoal idak-idak nian, nia parte labele fo komentariu.
Iha fatin ketak, Jurista Sergio Dias Quintas husu Ministeriu Publiku atu tau prioridade ba kazu Roo Haksolok.
“Kazu Roo Haksolok sai polemika iha ita nia sosiedade, tanba nee Ministeriu Publiku nuudar titular asaun penal, ita hotu enkoraja Ministeriu Publiku atu tau prioridade ba kazu Roo Haksolok hodi rezolve lalais kazu Roo Haksolok nee,” dehan Jurista Sergio.
Sergio argumenta, rezolve signifika katak se iha indisus ruma Ministeriu Publiku tenke haree investiga ona tuir tramitasaun prosesual neebe iha, atu akuza se mak envolve.
“Se prosesu Roo Haksolok kontinua aguarda iha Ministeriu Publiku sei kontinua hamosu polemika, tanba prosesu iha hela MinisteriuPubliku. Espera katak Prokurador Jeral Republika servisu ho profisionál hodi haree prosesu nee, tanba sai polemika ba iha sosiedade,” dehan Sergio.
Nia afirma, Governu ida tun no Governu ida sae hanesan konsumu politiku, tanba nee Ministeriu Publiku mak tenke haree didiak fo serteja atu rezolve kestaun nee, karik iha difikuldade kona-ba meius de provas ruma, Ministeriu Publiku tenke uza rekursu neebe iha hodi rezolve.
“Kazu Roo Haksolok mai ho nia natureza kompleksidade, maibe Ministeriu Publiku servisu ho imparsial, profisional bele rezolve, se iha indisus kona-ba krime ruma prosesu lao hodi lori too iha Tribunal,” katak Sergio.
Nia akresenta, kazu kuandu tama ona iha Ministeriu Publiku, iha dalan rua deit, arkiva ka akuza, maibe kona-ba kazu Roo Haksolok kazu nee kompleksu em termus de provas, liga ho difikuldade ruma Ministeriu Publiku atu hetan provas mak halo demora, Ministeriu Publiku tenke esplika ba iha publiku kuandu seidauk iha meius de provas.
Aleinde nee, Jurista Jose Maria Guterres dehan, Prokurador mak sei haree iha elementu ba krime ka lae.
“Prokurador nuudar nain titular ba prosesu, haree prosesu nee iha duni elementu krime ka lae? kompetensia ba iha Ministeriu Publiku mak atu haree ida nee,” dehan nia.
Nia hatutan, Ministeriu Publiku mak sei haree kona-ba halo kontratu sira nee tuir lei aprovizionamentu ka lae? no Governu neebe mak sentraliza, tanba iha lei aprovizionamentu koalia mos ida nee.
Jornalista: Terezinha De Deus
Editor: Xisto Mendonça
