DILI, STLTIMORLESTE.com – Kona-ba prosesu Roo Nakroma nian, oras nee daudaun husi parte Komisaun Anti Korupsaun (KAK) rekolha ona dokumentus no kontinua halo hela averiguasaun.
“Ita iha hela prosesu averiguasaun, agora lao hela, tanba dokumentus ita halibur hotu ona barak los, iha krime korupsaun dokumentus sira nee presiza haree ho kuidadu, ita nia ekipa mos natoon deit,” dehan Diretor Investigasaun KAK, Jose Verdial ba jornalista sira iha Farol, Kuarta (21/01/2026).
Nia hatutan, dokumentus barak seidauk haree hotu, kona-ba krime korupsaun laos haree deit dokumentus ida rua halo ona konkluzaun nee lae, tenke haree dokumentus too hotu.
Nia sublina, prosesu averiguasaun ekipa la bolu ema ruma mai presta deklarasaun, bolu ema ruma mai presta deklarasaun kuandu delegasaun mai husi Ministeriu Publiku (MP) mak foin notifika ema.
Tanba nee, se iha deit prosesu averiguasaun, bele dehan servisu iha fatin deit rekolha informasaun, rekolha dokumentus halo analiza haree aspetu hotu mak foin bele halo konkluzaun. Labele haree deit nia naran halo konkluzaun ba krime nee labele.
“Ita nia lei prosesual penal hateten klaru katak, Ministeriu Publiku mak nain ba asaun penal, signifika katak investigasaun ida atu lao MP tenke rejista ona hanesan auto inkeritu. No delega ona ba iha orgaun Polisia Investigasaun Kriminal sira mak foin halo investigasaun,” dehan nia.
Maibe iha averiguasaun sei halibur informasaun, kuandu iha ona indisus mak foin submete ba iha MP hodi uza nia kompetensia halo apresiasaun, se sira haree prienxe rekezitus mak foin rejistu hanesan auto inkeritu, depois mak MP bele deside sira bele investiga rasik ka delega ba iha orgaun Polisia Kriminal sira hodi halo investigasaun.
(ter)
