DILI, STLTIMORLESTE.com – Relasiona ho informasaun nebee espalha, antes nee Komisaun Anti Korupsaun (KAK) halo buksa ba iha SERVE, I.P no halo identifikasaun ba dirijente balu, tanba nee Komisariu KAK, Rui Pereira deklara katak, sira rona ona sasin balu no rekolha ona dokumentu.
Tuir Komisariu KAK, Rui Pereira katak, investigasaun lao hela, atu hetan provas ka la hetan provas servisu mak determina.
“Iha SERVE nee testemunha sira responsável no dokumentu ligadu iha rekolha hotu,” dehan Komisariu KAK, Rui Pereira ba jornalista sira iha MENEK, Dili, Tersa (18/03/2025).
Hatan kona-ba testemunha hirak mak rona ona, nia parte dehan sei iha prosesu nia laran, Komisariu labele temi kona-ba testemunha hira mak rona ona.
Antes nee Komisariu KAK mos deklara ona katak, atividade buska liga ho informasaun balu neebe iha.
“Atividade buska halo tanba iha ligasaun ho kazu neebe mak Komisaun Anti Korupsaun halo hela prosesu investigasaun, buska nee hahu uluk husi Unidade Informasaun Seguransa KAK nian, iha Diresaun Investigasaun Kriminal nian,” dehan Komisariu.
Nia hatutan, iha SERVE informasaun balu espalha no husi maluk sira neebe hatoo keixa, no informasaun neebe KAK rasik inisiativa rekolha, presiza haree fali se dehan Diretor Ezekutivu ho nia ema sira halo buat ruma la loos, labele rona deit husi media sira, maibe presiza haklean investigasaun hodi haree krimi ruma akontese ka lae.
Komisariu dehan, kazu nee liga ho kazu neebe akontese ka espala iha publiku kona-ba Diretor Ezekutivu SERVE ho nia ema sira, no iha identifikasaun nee foti sira neebe sente sai responsabilidade ba kazu neebe mak atu halo prosesu mak hanesan Diretor Ezekutivu SERVE ho nia Adjunta no mos funsionariu relevante neebe presiza atu halo identifikasaun tuir lei dentru 12 tempu atu halo prosesu.
Nia dehan, dirijenti neebe KAK foti hodi halo identifikasaun liga ho kazu neebe mak iha alegasaun hasoru sira, iha video viral no deskonfia buat ruma la loos iha neeba, prosesu rekrutamentu ema no balu halo kobransa, tanba nee KAK halao servisu ruma bazeia ba kompetensia neebe lei atribui ba.
Se rekolha hotu no haree iha indisus ba krimi ruma, tenke halo partisipasaun ba iha Ministeriu Publiku atu haree formalmente, se delegasaun tun mai komplementu ba regra sira neebe iha tuir prazu no tempu neebe iha.
Momentu neeba KAK hamutuk ho Polisia Nasional Investigasaun Kriminal (PNSIK) iha loron Tersa (25/02/2025) halo buska ba iha edifisiu SERVE neebe lokaliza iha Obrigadu Barak.
Halo buska refere, ligasaun ho informasaun neebe espalha kona-ba deskonfia kobransa ilegal no mos deskonfia pratika sistema familiarizmu iha rekrutamentu ba servisu balu.
Ekipa refere too iha Edefisiu Obrigadu Barak maioumenus oras tuku 9 resin, hodi halo buska ba fatin neeba no identifika ba naran neebe iha, maibe iha dirijenti nain lima kompletu, iha ida mak halao hela servisu iha munisipiu. Ho nunee KAK foti kedan dirijenti nain 5 mai iha KAK hodi halo identifikasaun.
No iha loraik tuku 2, KAK kontinua foti tan dirijenti nain tolu, hodi mai iha KAK halo identifikasaun, liga ba iha informasaun neebe espalha kona-ba deskonfia kobransa ilegal no mos deskonfia pratika sistema familiarizmu iha rekrutamentu ba servisu balu. Tanba nee KAK foti dirijenti hamutuk nain 8 mak ba iha KAK hodi halo identifikasaun, nain lima iha dader no nain tolu iha loraik.
(ter)
