DILI, STLTIMORLESTE.com – Ministeriu Publiku (MP) iha alegasaun ba kazu Zizelma Maria Fatima Verdial Gonsalves nia mate, husu Tribunal atu kondena arguidu ho inisial MSC.
Iha alegasaun nee Prokurador Rafael Gusmão deklara katak, arguidu hili direitu nonok. Maibe deklarasaun husi testamunha sira, husi autoridade polisia tranzitu nian katak, arguidu soke vitima iha zebra kros, no motor rasta vitima too ba iha fatin neebe vitima latan ba 8 metru.
MP deklara, sasin Nelia Maria da Roza Verdial De Araujo deklara, rona tarutu sai mai haree vitima latan hela, no sasin Domingos dos Reis Amaral de Souza mos deklara, iha kareta ida fo dalan vitima atu liu, maibe arguidu halai ho velosidade makaas ikus mai hodi soke vitima, lori too ba iha hospital maibe la salva.
MP deklara, video CCTV neebe oferese husi Loja Funan Buras hatudu katak, arguidu halai ho velosidade makaas, hodi ikus mai soke vitima mate.
Tanba nee MP haree katak, maske arguidu hili direitu nonok, maibe bazeia ba deklarasaun husi Polisia Tranzitu nian, no sasin nain rua nian, MP haree katak provadu arguidu komete krimi neebe MP akuza ba.
Tanba nee MP la iha duvidas, no haree katak aktu arguidu nian primeiru konduz motor la ho kuidadu, segundu arguidu ultrapasa kareta hodi soke vitima, terseiru motor neebe arguidu uza xapa matrikula motor seluk nian. Tanba nee MP husu Tribunal atu kondena arguidu pena unika prizaun tinan 5.
Enkuantu iha alegasaun nee, Asistente Eustaquio Guterres deklara katak, arguidu hanesan foin sae ida konduz motor la ho kuidadu. No arguidu soke tiha vitima mate, iha sala julgamentu arguidu hili direitu nonok, no arguidu la deklara arependimentu.
Asistente deklara, arguidu soke tiha vitima depois arguidu halai, autoridade seguransa mak kaer fali arguidu, no arguidu soke vitima iha kedan zebra kros.
Tanba nee asistente husu Tribunal atu kondena arguidu pena prizaun tinan 6. Kona-ba indemnizasaun asistente koalia ona ho familia sira, maibe familia sira la aseita, tanba nee husu Tribunal mak tetu.
Enkuantu defeza arguidu nian Americo iha alegasaun deklara katak, la iha opozisaun kona-ba alegasaun husi Ministeriu Publiku no asistente nian. Maibe defeza husu Tribunal atu haree deklarasaun sira hotu husi inisiu kedan, hodi bele tetu no foti desizaun.
Rona tiha alegasaun, Tribunal adia ba loron 11 hodi tama ba iha desizaun, maibe desizaun nee sei notifika deit Prokurador Prosesu, Asistente no Defeza.
Jornalista: Terezinha De Deus
Editor: Xisto Mendonça
