BAUKAU, STLTIMORLESTE.com – Prosesu sumariu ba kazu arguidu inisial SDC hasoru Amu Paroku Santa Terezinha Kelikai, Padre David Savio, SDB neebe realiza iha Tribunal Distrital Baukau (TDB) seidauk iha solusaun, tanba nee kontinua ba julgamentu.
Iha loron Kuarta nee (21 Maiu 2025) parte loraik, TDB realiza prosesu sumariu ba kazu neebe involve direita husi arguidu SDC hasoru Amu Paroku Santa Terezinha Kelikai, Padre David Savio, SDB rezulta kamizola nakles iha isin lolon.
“Prosesu sumariu nee nia pena la boot liu tinan 5. Dezisaun ate agora seidauk, ita rona fali desizaun iha dia 02 Junhu 2025, tuku 09:00, ohin iha deit alegasaun depois mak rona fali dezisaun tuir mai,” hateten Defensor Publiku, Albino de Jesus Pereirra ba jornalista sira iha Vila Nova Baukau, Tersa (21/05/2025).
Nia sublina, kazu refere hetan alegasaun bazeia ba faktus, tanba laiha ofensa integridade fizika simples, maibe danu simples, tanba estraga sasan balun hanesan kamizola, nunee aplika suspensaun ba arguidu.
Prosesu sumariu seidauk deside suspensaun, tanba sei kontinua iha loron 02 Junhu 2025, liu husi julgamentu iha Tribunal Distrital Buakau hodi rona dezisaun final.
Durante prosesu sumariu vitima fo perdaun ba arguidu no asaun neebe arguidu halo rona liafuan husi funsionariu balun iha kartoriu no vitima haruka fila arguidu husi kartoriu, hafoin arguidu nervozu halo asaun hasoru vitima.
Nunee durante prosesu sumariu Tribunal tenta halo rekonsiliasaun, maibe seidauk iha solusaun, tanba nee kontinua ba faze julgamentu.
“Amu dehan komunidade Kelikai ema barak, entaun tenke ba faze ida naran julgamentu, para ema bele haree katak, saida mak halo ba nee Amu bele fo ona perdaun mais tenke halo julgamentu, nunee komunidade hatene kazu ba julgamentu,” hateten Defeza.
Prosesu sumariu Defensoria Publiku husu aplika pena admisaun ba arguidu, tanba kazu neebe akontese la boot liu no arguidu halo kazu refere laos interese direita, maibe iha motivasaun halo arguidu nervozu.
Prosesu sumariu prezide husi juiza Sonala, reprezentante Ministeriu Publiku, Bartolomeu de Araújo, arguidu hetan defeza husi Defensoria Publiku, Albino de Jesus Pereirra.
Entretantu kazu refere akontese iha loron 12 Maiu 2025, bainhira SDC atu trata sertidaun batizmu oan nian iha kartoriu Parokia Kelikai.
(tom)
