DILI, STLTIMORLESTE.com – Relasiona ho prosesu Veteranus iha Suai nian, ekipa Komisaun Anti Korupsaun (KAK) nian ba tiha ona iha Suai, tanba nee Komisariu hein deit atu simu relatoriu.
“Ekipa ba tiha ona, hein ita sei simu relatoriu neebe sira sei prepara, hanoin kazu nee konkretu klaru tebes, provas sufisiente bele lori ba oin,” dehan Komisariu KAK, Rui Pereira ba jornalista sira iha Farol, Kuarta (21/05/2025).
Nia hatutan, kazu nee sira iha planu atu ba terenu, maibe hetan delegasaun husi Ministeriu Publiku, Polisia sira ba halo ona investigasaun primeiru molok KAK ba, tanba nee depois sira konklui investigasaun katak, kazu veteranus nee tama iha kompetensia KAK nian, tanba nee mak entrega ba iha Prokurador no Prokurador entrega ba iha KAK hodi halao servisu iha terenu.
Hatutan tan, atu hasai ema ruma ba Prokurador relatoriu no sasin sira tenke kompletu, no dokumentus neebe rekolha komprova katak, ema sira nee envolve iha krimi ruma, no provizoriamente sasin nain rua ka tolu mak envolve iha kazu nee.
Esplika tan, kona-ba prosesu sira seluk neebe iha hela KAK hanesan UNTL, PNDS, kazu lubuk ida neebe mak iha KAK servisu neebe iha lao daudaun ona, iha balu mak konklui ona relatoriu investigasaun final nian no haruka ba iha Ministeriu Publiku. Tanba KAk nia kompetensia iha deit faze investigasaun.
Iha fatin ketak, Akademiku UNTL, Sebastião dos Santos dehan, husu KAK atu halo investigasaun ba aktu nee.
“Husu KAK atu kontinua halo investigasaun ba aktu nee, atu nunee iha futuru bele halo prevensaun,” dehan nia.
Hatutan tan, aktu ida nee la diak buat hotu tenke lao tuir regra neebe mak iha, atu ema hotu hakruk ba regra nee.
Antes nee, iha loron 19 Fevereiru 2025, Polisia Nasional Timor Leste (PNTL) liu husi Departamentu Investigasaun Nasional (DIK) dezloka ba Munisipiu Kovalima hodi ezekuta mandadu judisiariu husi Tribunal ho NUC: 0037/25/PNSIC hodi halo apreensaun buska domisiliaria ba suspeitu FDS nia rezidensia iha Suai (Kovalima).
Iha apreensaun buska domisiliaria ba suspeitu FDS nia rezidénsia, iha Suai, DIK konsege halo apreensaun ba suspeitu nia patrimoniu hanesan karreta, tais-mane hamutuk 28, tais-feto 14, osan-mean, konta bankaria BNCTL tolu no osan ho montante US$ 70.
(ter)
