DILI, STLTIMORLESTE.com – Tribunal Judisial Primeira Instansia Dili liu husi despaisu ba prosesu sumariu neebe rezulta Zizelma Maria Fatima Verdial Gonçalves lakon vida, deside hodi aplika pena prizaun tinan 3 suspende tinan 4 ba arguidu ho inisial MSC, tanba nee asistente la konkorda no hatama ona rekursu ba iha Tribunal Rekursu.
“Atu informa rekursu ami hatama ona ohin, ida nee kompetensia Tribunal Primeira Instansia nian banhira mak hasae prosesu nee ba iha Tribunal Rekursu,” dehan Asistente Eustaquio Guterres ba jornalista STL iha Kaikoli, Segunda (14/04/2025).
Nia hatutan, fundamentasaun saida mak enkaixa iha rekursu laran nee labele esplika, maibe iha rekursu nee fundamenta no motivasaun, tanba la simu desizaun Tribunal Primeira Instansia aplika ba arguidu, liu-liu ba pena tinan 3 suspende ba tinan 4.
Desizaun Tribunal Primeira Instansia la justu, la edukativu, tanba nee mak halo rekursu no Tribunal Rekursu mak sei deside kona-ba fundamentu husi rekursu neebe hatoo.
No rekursu neebe hatama laos deit asistente mak halo, tanba antes nee Prokurador Jeral Republika deklara ona katak, sei nomeia Prokurador iha hodi substitui Prokuradora Bemvinda Do Rozario, signifika katak Prokurador mos la aseita ho desizaun Primeira Instansia no Prokurador mos sei prepara hela atu hatoo rekursu.
Entretantu hatan kona-ba se Tribunal Rekursu indefere sira nia pedidu, Eustaquio dehan ida nee depois mak sei haree fali, tanba agora sei iha faze rekursu, Tribunal sei haree buat barak neebe asistente aprezenta, inklui dokumentus balu neebe junta hamutuk iha rekursu nee. Maibe tau konfiansa katak, ho rekursu nee Tribunal Rekursu sei muda buat balu liga ho desizaun neebe Tribunal Primeira Instansia deside ona.
Nunee video neebe viral durante nee iha CCTV besik fatin akontesimentu, sita mos kona-ba motor neebe konduz husi arguidu nia matrikula oin seluk, uza fali xapa matrikula NGO ida nian, tanba nee saida mak relasaun ho akontesimentu nee hodi rezulta vitima mate, junta hamutuk hotu ho rekursu neebe hatama.
Maibe nia prezensa hanesan asistente atu haree kona-ba prosesu nebee iha, atu halo koordenasaun ho Ministeriu Publiku bele haree mos ba iha akuzasaun no rekursu, bele mos hatoo rekursu mesak, no Ministeriu Publiku mos bele hatoo rekursu mesak. No nia prezensa laos hanesan Defensor Publiku ka Advogadu Privadu, mezmu mai husi Defensor Publiku, maibe pozisaun agora hanesan asistente atu akompanha vitima nia familia no servisu hamutuk ho Ministeriu Publiku too prosesu nee termina.
Iha fatin ketak, Jaime do Rego Gonçalves, aman husi vitima deklara katak, sira buka justisa.
“Ami presiza justisa, soke hau nia oan iha zebra kros Juiz la koalia dehan la sala Juiz dehan la sala dezastre, motor soke hau nia oan uza plat seluk nian, falsifika dokumentus Juiz sira la tetu ida nee,” dehan Vitima nia aman, Jaime Do Rego Gonçalves.
Nia hatutan, nia iha oan mane nain 4 no ida neebe mate hanesan oan feto mesak no ikun, no hakarak ba iha uma mutin nee atu buka justisa, no presiza Justisa no husu Juiz sira atu fo justisa neebe loos.
Matebian nia aman dehan, husu mos ba iha Parlamentu Nasional atu haree justisa nee los ka lae atu hadia lei nee.
(ter)
