DILI, STLTIMORLESTE.com – Tribunal Judisial Primeira Instansia Dili (TJPID) liu husi despaisu ba prosesu sumariu deside aplika pena prizaun tinan 3 suspende tinan 4 ba arguidu inisial MSC, neebe soke mate Zizelma Maria Fatima Verdial Gonsalves no Tribunal notifika ona despaisu ba asistente no Ministeriu Publiku atu la konkorda bele halo rekursu.
“Sai hanesan asistente ba vitima, desizaun sai tiha ona, Tribunal notifika ba ami liu-liu ba Ministeriu Publiku no mos ba ami hanesan asistente, no prosesu rekursu ami koordena ona ho Ministeriu Publiku hanesan asistente halo ona preparasaun hodi halo rekursu ba iha desizaun neebe iha,” dehan Asistente Eustaquio Guteres ba jornalista sira iha Tribunal, Dili, Tersa (01/04/2025).
Nia hatutan, prepara ona rekursu, no desizaun nebee sai nee Tribunal notifika ona, nia prazu loron 30 sei koordena ho Ministeriu Publiku neebe hanesan nain ba iha prosesu ida nee, mezmu sai asistente nafatin halo koordenasaun atu halo rekursu ba iha desizaun neebe Tribunal deside.
Hatan kona-ba saida mak fundamenta iha rekursu, nia parte dehan fundamentasaun nee defeza no Ministeriu Publiku mak sei hatene klean kona-ba ida nee, no prontu ona atu halo rekursu ba iha desizaun Tribunal.
Iha sorin seluk, Akademiku Universidade Nasional Timor Lorosae (UNTL), Rafael de Jesus dehan, prosesu sira hanesan nee la aseita desizaun tenke liu husi rekursu.
“Hau hanoin tenke liu husi rekursu kuandu la simu desizaun ruma, tanba liu husi rekursu bele iha fali dalan seluk hodi haree kona-ba prosesu nee,” dehan nia.
Antes nee vitima nia aman, Jaime do Rego Gonsalves dehan, sira buka justisa tanba sira nia oan hetan soke no mate.
“Ami presiza justisa soka hau nia oan iha zebra kros Juiz la koalia dehan la sala, Juiz dehan la sala dezastre, motor soke hau nia oan uza plat seluk nian, falsifika dokumentus, Juiz sira la tetu ida nee,” dehan Vitima nia aman.
Nia hatutan, nia iha oan mane nain 4 no ida neebe mate hanesan oan feto mesak no ikun, no hakarak ba iha uma mutin nee atu buka justisa no husu Juiz sira atu fo justisa neebe loos.
Matebian nia aman dehan, husu mos ba iha Parlamentu Nasional atu haree justisa nee los ka lae? atu hadia lei nee, atu tetu lei nee loos ka lae?.
Iha loron 28 fulan Marsu Tribunal liu husi Juiz Jose Gonsalves hasai desizaun hodi aplika pena prizaun tinan 3 suspende tinan 4 ba arguidu. Prosesu nee Ministeriu Publiku reprezenta husi Prokuradora Bemvinda do Rozario, arguidu hetan asistensia legal husi Advogadu Privadu.
(ter)
