DILI, STLTIMORLESTE.com – Prosesu Zizelma Maria Fatima Verdial Gonçalves lakon vida, Tribunal Primeira Instansia Dili deside hodi aplika pena suspensaun ba arguidu inisial MSC, Prokurador la aseita hodi hatama ona rekursu ba iha Tribunal Rekursu.
Tuir fontes konfirmadu ba jornalista STL iha loron Tersa nee (22/04/2025) katak, prosesu refere Prokurador titular hatama ona rekursu ba iha Tribunal Rekursu.
Tuir fontes nee, rekursu hatama ona ba iha Tribunal Rekursu, maibe too agora seidauk hetan notifikasaun ba desizaun, tanba sei iha rekursu nia laran.
Fontes nee sublina, rekursu nee hatama ona iha loron 15 ka loron 16 fulan Abril nee, no hein deit desizaun husi Tribunal Rekursu.
Reforsa, rekursu nee iha fundamentu, husu atu halo alterasaun kualifikasaun de direitu, no alterasaun kualifikasaun dos faktus, neebe tuir artigu 273 no artigu 274 husi kodigu prosesu penal.
Nunee, husu mos atu halo fali rejulgamentu, depois Tribunal Rekursu reviu fali prosesu nee mai fali iha Tribunal Primeira Instansia hodi halo julgamentu foun, atu bele apura faktus balu neebe la konsege produs iha audensia julgamentu prosesu sumariu.
Fontes dehan, rekursu neebe hatama husu atu altera krimi omisidiu neglijente ba fali iha omisidiu simples, atu koletivu mak halo julgamentu, maibe hein desizaun husi Tribunal Rekursu nian.
Iha fatin ketak, Asistente Eustaquio Guterres deklara katak, nia parte mos hatama ona rekursu ba iha Tribunal.
“Atu informa rekursu ami hatama ona, ida nee kompetensia Tribunal Primeira Instansia nian banhira mak hasae prosesu nee ba iha Tribunal Rekursu,” dehan Asistente.
Nia hatutan, fundamentasaun saida mak enkaixa iha rekursu laran nee labele esplika, maibe iha rekursu nee fundamenta no motivasaun, tanba la simu desizaun Tribunal Primeira Instansia aplika ba arguidu, liu-liu ba pena tinan 3 suspende ba tinan 4.
Desizaun Tribunal Primeira Instansia la justu, la edukativu, tanba nee mak halo rekursu, no Tribunal Rekursu mak sei deside kona-ba fundamentu husi rekursu neebe hatoo.
Hatan kona-ba se Tribunal Rekursu indefere sira nia pedidu, Eustaquio dehan ida nee depois mak sei haree fali, tanba agora sei iha faze rekursu, Tribunal sei haree buat barak neebe asistente aprezenta, inklui dokumentus balu neebe junta hamutuk iha rekursu nee. Maibe tau konfiansa katak, ho rekursu nee Tribunal Rekursu sei muda buat balu liga ho desizaun neebe Tribunal Primeira Instansia deside ona.
Aleinde nee, Jaime Do Rego Gonçalves, aman husi vitima deklara katak, sira buka justisa.
“Ami presiza justisa soke hau nia oan iha zebra kros Juiz la koalia dehan la sala, Juiz dehan la sala dezastre, motor soke hau nia oan uza plat seluk nian, falsifika dokumentus Juiz sira la tetu ida nee,” dehan Vitima nia aman, Jaime Do Rego Gonçalves ba jornalista sira Sesta Loraik nee iha Tribunal Dili.
Nia hatutan, nia iha oan mane nain haat no ida neebe mate hanesan oan feto mesak no ikun, no hakarak ba iha uma mutin nee atu buka justisa, no presiza Justisa, no husu juiz sira atu fo justisa neebe loos.
Matebian nia aman dehan, husu mos ba iha Parlamentu Nasional atu hare justisa nee los ka lae atu hadia lei nee.
Prosesu refere antes nee Prokuradora Bemvinda do Rozario mak kaer, maibe depois Tribunal Primeira Instansia liu husi prosesu sumariu deside hodi aplika pena suspensaun ba arguidu, no mosu polemika iha sosiedade. Tanba nee Konselhu Majistradu Ministeriu Publiku deside fali no rekursu neebe hatama ba iha Tribunal Rekursu ba ho Prokurador Titular foun, Prokurador Rogerio Viegas.
(ter)
