DILI, STLTIMORLESTE.com – Relasiona ho prosesu Zizelma neebe Tribunal aplika pena suspensaun, Ministeriu Publiku sei halo rekursu tuir regra neebe iha.
Prokurador Jeral Republika, Alfonso Lopez hatoo sentidu kondolensia ba familia enlutada, sente lakon alin feto ida, Ministeriu Publiku nia pozisaun depois hetan konhesimentu ba desizaun ida nee, agora prepara ona sei hatun despaisu atu halo buat ruma.
Presiza alerta katak, desizaun nee seidauk final, nee desizaun Tribunal Primeira Instansia, desizaun nee seidauk tranzitu enjulgadu, nee dehan saida, seidauk metin,” dehan Alfonso ba jornalista sira iha Parlamentu Nasional, Kinta nee (03/04/2025).
Nia hatutan, kuandu prosesu sira kona-ba negligente ka omisidiu desizaun Tribunal sai notifika Ministeriu Publiku no Advogadu, no tuir Kodigu Prosesu Penal foun durante loron 30 la konkorda toma pozisaun halo rekursu.
Ba desizaun ida nee Ministeriu Publiku sei iha estratejia prosesual, apelu ba publiku hotu ho kalma, tanba dalan sei nakloke, seidauk iha tranjitu enjulgadu, no sei prepara asaun tuir mai, tanba kualker desizaun halo analiza hodi halo rekursu. No hatun despaisu atu subtitui Prokuradora nia fatin.
“Ministeriu Publiku nee ita bolu dehan ida, no ida nee ita haree katak presiza atu subtitui karik Prokurador, ita deside Prokurador seluk, kuandu PJR kontra nia desizaun tenke por despaisu nomeia Prokurador seluk,” dehan nia.
Nia hatutan, Ministeriu Publiku atua tenke respeitu direitu ba ema hotu no garantia mos direitu arguidu nian.
Iha fatin hanesan, Ministru Justisa, Sergio Hornai dehan, presiza melhora liu tan, atu justisa ida neebe ho kualidade, no reforma laos atu hasai ema ka hatama ema, maibe reforma nee atu hasae mos kualidade no konhesimentu.
“Fo reflesaun atu halo kampanha dezeminasaun ida, joven neebe sei minoridade labele uza motor, lae inan aman mos konsiente, labarik sira raan manas uza motor, no sei halo dezeminasaun oinsa mak haree medida sira prevensaun nian,” dehan MJ, Sergio.
Nia dehan, kuandu uza viatura tenke hatene iha ema movimentu tenke kuidadu atu labele mosu insidente, bele fo perigu ba ema nia vida.
Maibe sei haree formasaun ba iha investigasaun akuzasaun no apresiasaun Juiz sira ba kazu sira neebe mosu ona, atu fo justisa ho imparsial atu hatur balansu justisa ho lo-loos.
Aleinde nee, Asistente Eustaquio Guterres deklara, sei hamutuk ho Prokurador hodi halo rekursu.
“Sai hanesan asistente ba vitima, desizaun sai tiha ona Tribunal notifika ba ami liu-liu ba Ministeriu Publiku no mos ba ami hanesan asistente, no prosesu rekursu ami koordena ona ho Ministeriu Publiku hanesan asistente halo ona preparasaun hodi halo rekursu, ba iha desizaun neebe iha,” dehan Asistente.
Nia hatutan, prepara ona rekursu no desizaun nebee sai nee Tribunal notifika ona, nia prazu loron 30 sei koordena ho Ministeriu Publiku neebe hanesan nain ba iha prosesu ida nee, mezmu sai asistente nafatin halo koordenasaun atu halo rekursu ba iha desizaun neebe Tribunal deside.
Hatan kona-ba saida mak fundamenta iha rekursu, nia parte dehan fundamentasaun nee defeza no Ministeriu Publiku mak sei hatene klean kona-ba ida nee, no prontu ona atu halo rekursu ba iha desizaun Tribunal.
Prosesu refere iha julgamentu Sumariu prezide husi Juiz Jose Gonsalves, Ministeriu Publiku reprezenta husi Prokuradora Bemvinda do Rozario, arguidu hetan asistensia legal husi Advogadu Privadu.
(ter)
