DILI, STLTIMORLESTE.com – Prosesu vitima Zizelma Maria Fatima Verdial Gonsalves, neebe antes nee Tribunal Primeira Instansia hasai desizaun hodi aplika pena suspensaun ba arguidu nee, husi parte asistente la konkorda halo rekursu ba iha Tribunal Rekursu (TR), no ikus mai TR deside afavor ba asistente nia pedidu rekursu, hodi deside no husu Tribunal Judisial Primeira Instansia Dili bele halo fali re-julgamentu foun.
“Tribunal Rekursu notifika mai hau horiseik no ohin mak hau simu, TR hateten klaru prosesu neebe akontese hasoru vitima Zizelma nee TR aseita husi hau nia rekursu katak, re-julgamentu fali ba prosesu ida nee,” dehan Asistente Eustaquio Guterres ba jornalista sira iha Kaikoli, Sexta (27/06/2025).
Nia hatutan, iha TR nia desizaun esplika klaru, faktus neebe provadu Tribunal Primeira Instansia tenke haree fila fali, no mos faktus neebe la provadu Tribunal Primeira Instansia mos tenke haree fila fali, inklui faktus foun neebe aprezenta liu husi asistente. Hanesan asistente konsidera sei re-julgamentu fila fali.
Esplika tan, atu halo re-julgamentu nee mai ho prosesu oinsa, ida nee kompetensia Tribunal Judisial Primeira Instansia nian, no desizaun TR nian mak dehan re-julgamentu fila fali, no Tribunal Primeira Instansia mak sei marka banhira mak re-julgamentu fali, no banhira mak atu notifika fila fali ema sira neebe ligasaun ho prosesu nee, ida nee kompetensia Tribunal Primeira Instansia nian.
Nia ublina, juiz sei mantein nafatin, maibe Ministeriu Publiku mak dala ruma sei iha mudansa, no prosesu nee TR aseita ho asistente sira nia rekursu.
Tuir observasaun STL nian, antes nee arguidu submete ba iha prosesu sumariu, neebe prezide husi Juiz Jose Gonsalves no Prokuradora Bemvinda do Rozario, akompanha ho asistente Eustaquio Guterres, no arguidu hetan asistensia legal husi Advogadu Privadu.
Depois desizaun sai, familia sira la konkorda hodi eziji justisa, tanba nee mak familia hatama faktus foun ba iha asistente hodi submete ba iha TR.
(ter)
