DILI, STLTIMORLESTE.com – Polísia Sientífika Investigasaun Kriminál (PSIK) solisita ba Ministeriu Públiku (MP) detein dirijenti Igreja Katólika Karismatiku Timor Leste (ICCTL – sigla português).
Investigador Xefe Portavos PSIK, Mario Tavares dehan, solisita ba Ministeriu Públiku atu promove mandadu detensaun hodi detein dirijenti ICCTL, tanba atividade sira halo konsidera iha inisiu ba enkudramentu krimi.
Porta voz PSIK nee tenik, iha Tersa (15/4) halo tan identifikasaun ba sidadaun nain ida neebe ho inisial NB tanba uza konta facebook tolu hodi halo propaganda hodi reforsa atividade ICCTL.
“Hafoin PSIK rekolha tiha provas sira halo tiha analiza no ezame ba provas sira nee PSIK haree katak hahalok ne’ebé mak sidadaun sira nee halo prienxe enkuadra krimi ka elementu krimi neebe mak Ministeriu Públiku imputa ba arguidu sira liu-liu krimi burla agravadu, asosiasaun kriminoza no diskriminasaun rasial relijioza, tanba nee PSIK nuudar autoridade kompetente sei solisita ba Ministeriu Públiku hodi Ministeriu Públiku atu promove mandadu detensaun hodi detein sidadaun sira nee,” dehan PSIK, Mário Tavares ba jornalista sira liu husi konferensia imprensa neebe halao iha edifisiu PSIK Kaikoli, Kuarta (16/04/2025).
Investigador Mário esplika, hafoin iha Sesta (11/4) PSIK ezekuta tiha mandadu judisriu hodi halo auto aprensaun no buska domisiliariu ba sidadaun FM no ANMP nian rezidensia iha Kamea, Bekora no Motael, tanba alegadamente nuudar dirijenti masimu hodi lídera ICCTL.
Nia deklara, PSIK kontinua halo dilijensia investigasaun ba kazu nee no bazeia ba PSIK nia ezaminasaun ba kazu nee detekta katak iha dispozitivu ba informátika balun neebe mak hatudu katak hahalok sira neebe sidadaun sira nee halo iha duni indisiu ba krimi neebe MP imputa ba sidadaun sira nee.
“Sim, tuir provas neebe mak iha faze de prova iha enkudramentu kriminal neebe mak iha kuandu iha mandu judisiariu ba buska domisiliariu no auto aprensaun neebe kerdizer katak prensementu ba rekezitu krimi neebe mak iha,” nia hatutan.
Portavos PSIK nee mos informa, PSIK konsege hetan ID balun iha facebook neebe mak bele sai hanesan mind stream (otak dibelakan atividade sira nee).
“Ami identifika sidadaun ida ho inisial NB tanba nia mak uza ID tolu hodi suporta ba atidade sira liu husi prova situasaun sira iha media sosial,” nia haktuir.
Nia koalia, hafoin PSIK halo identifikasaun ba sidadaun referida PSIK haruka ba uma tanba iha faze identifikasaun. PSIK mos simu keixa sidadaun nain 2 liga ho sira nia envolvimentu iha organizasaun ICCTL.
Nia argumenta, sidadaun nain 2 nee presta deklarasaun iha PSIK tanba sente sai vitima hola parte iha ICCTL.
Rekorda fali katak, iha Sesta (11/4/2025) foin lalais nee PSIK ezekuta mandadu Tribunal hodi hala’o auto aprensaun no buska domisiliariu ba sidadaun nain 2 hodi halo buska domisiliariu no auto aprensaun ba sidadaun FM no ANMP nian rezidenska iha Kamea, Becora no Motael, tanba alegadamente nudar dirijenti masimu hodi lídera ICCTL.
Entretantu atividade auto aprensaun no buska domisiliariu nee PSIK halo aprensaun ba kazula no dokumentu sira neebe sidadaun sira nee uza hodi halo atividade organizasaun ICCTL, nunee PSIK lori sidadaun nain rua nee ba edifisiu PSIK hodi submete ba prosesu identifikasaun.
(jen)
