DILI, STLTIMORLESTE.com – Prosesu deklara konstitusionalidade ba Lei Pensaun Mensal Vitalisia sei lao hela.
Prezidente Tribunal Rekursu (PTR), Afonso Carmona dehan, nia la fo komentariu kona-ba prosesu deklara konstitusionalidade, tanba prosesu sei lao hela.
“Hau la fo komentariu kona-ba prosesu nia regra, prosesu nee distribuisaun ba Juiz, tanba Juiz titular nia sei halo prosesu. Tanba tenke halo notifikasaun ba parte kontrariu para fo resposta buat sira nee, nee ita labele termina bainhira. Importante nia lao, tanba prosesu tama mai tenke ba, entaun fo tempu, tanba nee hau labele prediksi katak fulan ida hotu, maibe depende ba nia prosesu. Importante nia andamentu lao para Juiz nee mak komete, nia prosesu lao ba mai diak hela, entaun ita hein Juiz termina nia prosesu, ikus mai sei involve Juiz nain hira atu halo deliverasaun,” dehan nia ba jornalista iha Palasiu Prezidensial Nicolau Lobato, Bairo Pite, Segunda (15/12/2025).
Nia hatete, nia labele fo komentariu, se lae dehan Prezidente Tribunal Rekursu mak foti desizaun sira nee, tanba nee ida nee regra no tuir nia prosesu.
“Hau prontu hasoru konsekuensia oin-oin, importante nia prosesu lao tuir nia dalan, ida nee mak hau hatete, imi hein oituan tanba prosesu parlamentu mak deside mai Prezidente promulga, agora mosu fali husi Provedor Direitus Humanus, tanba nee husu iha neeba labele husu hau, se husu hau entaun prosesu lao hela, mak nee deit,” dehan PTR nee.
Nia hatete, prosesu lao no ida neebe seidauk halo, PTR koko halo, no ida neebe mak halo tiha ona kontinua tanba sai lideransa nee laos halo buat neebe iha tiha ona, maibe tenke abranse situasaun estadu nia tuir lei haruka, tanba nee PTR mandatu remata sei hatoo buat hotu iha relatoriu.
Jornalista: Emerenciana Pinto
Editora: Domingas Gomes
