DILI, STLTIMORLESTE.com – Prezidente Tribunal Rekursu (PTR), Deolindo dos Santos hatete, tuir relatoriu neebe Kamara das Kontas iha orsamentu hamutuk tokon US$ 30, neebe molok nee VIII Governu Konstitusional aloka ba Programa Nasional Dezenvolvimentu Suku (PNDS) la lakon no seidauk haruka fila ba kofre estadu.
“Tanba nee atu hatete deit katak, PNDS nee tuir apresiasaun Kamara das Kontas nia katak, saida mak ami rekolha hotu nee, osan nee la lakon, osan nee iha hela, iha neeba sok la kumpri buat sira neebe hatete, tuir lo-loos osan nee uza la hotu mak tenke fila fali ba kofre estadu, mas la kumpri. Ami rekomenda nafatin para atu fo fila fali osan nee ba kofre estadu,” hatete PTR, Deolindo dos Santos ba jornalista sira, iha resintu PN, Kuarta (15/01/2025).
Deolindo hatutan, nia respeitu tomak opiniaun politiku neebe governante sira halo iha publiku, maibe Prezidente Tribunal Rekursu no Kamara das Kontas servisu tuir lei neebe iha no sei la ba defende partidu A ka B.
“Respeita tomak ba opiniaun politiku neebe governante sira halo iha intervensaun iha publiku, mas atu hatete deit katak ami la halo apresiasaun politika, ami la iha interese ba partidu A, B ka C ou Governu A, B ka C, maibe ami halo apresiasaun bazeia deit ba lei sira ho faktu sira neebe ami deskobre ho intendidade sira hatoo mai ami kona-ba servisu sira neebe mak ami halo,” tenik nia.
(alb)
