DILI, STLTIMORLESTE.com – Prezidente Tribunal Rekursu (PTR) deklara, atu estabelese Supremu Tribunal Justisa (STJ) sai mos hanesan planu prioridade, tanba nee sei estabelese iha tempu badak.
“Pontu ida mak atu instala Supremu Tribunal Justisa iha tempu badak, agora ita lao hela,” dehan Prezidente Tribunal Rekursu, Afonso Carmona ba jornalista sira iha Kaikoli, Segunda (12/05/2025).
Nia hatutan, instala nee liga ho rekursu umanus oinsa atu tau se se mak iha neeba, kona-ba estrutura no mos edifisiu ida nee agora lao hela, komesa identifika no dezenhu mos lao ona, bele lais ka bele kleur maibe dezenhu komesa lao ona.
Reforsa, banhira haree dezenhu nian loos ona mak sei haree fali kona-ba rekursu umanus nian. No ida nee tama iha planu neebe iha, tanba nee sei harii, kuandu la harii sai hanesan falhansu ida ba PTR.
Hatan kona-ba orsamentu hira gastu ba iha STJ, nia parte informa seidauk tama ba iha neeba, tanba Governu sei konvida sira atu halo reuniaun kona-ba ida nee. Tanba nee dezenhu iha ona, signifika planu mos lao hela.
Iha fatin ketak, Jurista Jose Maria Guterres dehan, Konstituisaun fo dalan, tanba nee tempu ona atu harii STJ.
“Hau hanoin tempu ona atu harii STJ, atu nunee bele haree kona-ba prosesu sira neebe ita nia lei preve,” dehan nia.
Hatutan tan, ohin loron mos rekursu umanus Timor iha ona, iha mos Juiz Timoroan barak neebe iha kapasidade, bele mos halao knaar iha fatin neeba.
Reforsa, kuandu STJ iha ona desizaun balu neebe Tribunal Rekursu hasai parte sira la aseita, bele rekore tan ba iha STJ hodi haree.
Antes nee, Prezidente Republika Jose Ramos Horta mos promete ona katak, sei esforsu molok nia mandatu termina sei estabelese STJ.
(ter)
