DILI, STLTIMORLESTE.com – Jurista Timoroan husu atu Prezidente Tribunal Rekursu foun (PTR) hatutan hikas servisu neebe PTR sesante halao hela.
“Ita espera katak, Prezidente Tribunal Rekursu foun nee bele halo servisu diak liu Prezidente sesante nee, hodi hatutan servisu neebe iha,” dehan Jurista Sergio Dias Quintas ba jornalista STL iha Tribunal Dili, Sesta (02/05/2025).
Nia hatutan, servisu neebe PTR sesante halo tiha ona nee, PTR foun bele kompleta no hatutan, no komunidade bele fo biban ba PTR foun hodi haree kona-ba nia prestasaun servisu diak ka lae. Maibe PTR foin simu pose tanba nee fo tempu atu PTR halao nia knaar.
Iha fatin ketak, Jurista Alexandre Corte Real katak, PTR foun halao servisu liu-liu haree ba kazu sira neebe pendente barak nee, se bele servisu ba atu redus kazu sira nee, tanba nee mak sai isu publiku kona-ba kazu pendente halo servisu diak atu lori justisa nee lao ba oin.
“Kona-ba jestaun administra justisa nee hau fiar nia bele halao, tanba nia esperiensia iha ona durante sai hanesan Juiz Administrador, hau nia mensajen administra didiak justisa iha Tribunal Rekursu hodi redus prosesu pendente,” dehan Alexandre.
Nia dehan, Carmona ema neebe iha kualidade, abtidaun makaas sai Juiz tuir kareira neebe iha, husi UNTAET nia tempu sai Juiz ona, nia iha kareira Juiz tinan 20 ona tanba nee iha esperiensia barak no sente haksolok banhira rona Juiz nee bele sai PTR. No estudu neebe halao laos mai husi Lisensiatura deit, maibe ho Mestradu neebe mai husi Bali, sente kontente PR bele fo fiar hodi sai hanesan PTR durante mandatu tinan 4 nia laran.
Konsidera Carmona ema neebe humilde kona-ba profisional labele kestiona tanba durante tinan 20 sai Juiz ona, ema neebe koalia ho haraik aan dedikativu no nakloke ba ema hotu.
(ter)
