DILI, STLTIMORLESTE.com – Prezidente Tribunal Rekursu (PTR), Afonso Carmona la fo komentariu ba desizaun husi Tribunal Rekursu deklara inkonstitusional artigu balun kona-ba rekrutamentu ajente Polisia Nasional Timor Leste (PNTL) foun tinan 2025.
Prezidente Tribunal Rekursu, Afonso hatoo kestaun nee ba jornalista sira, bainhira remata halo enkontru ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Kinta (15/01/2026).
Prezidente Tribunal Rekursu hatete, nia la fo komentariu mos liga ho deklarasaun husi Ministru Interior (MI) Francisco da Costa Guterres katak sei la anula no la biban halo revizaun ba Diploma Ministeriu Interior iha artigu balu neebe Tribunal Rekursu deklara inkonstitusional konaba rekrutamentu ajente Polisia Nasional Timor Leste (PNTL) foun tinan 2025.
“Ministru Interior mos hau labele koalia, tanba dehan inkonstitusional fila fali ba parlamentu atu altera lei ka lae, Ministru Interior la halo lei, nia so dehan deit hau rona komentariu, maibe sira halo selesaun hela ema halo asaun entaun sira la halo selesaun, entaun la tuir regra ida inkonstitusional nee sira la viola lei, maibe tanba regra nee iha hela, nunee fila fali ba parlamentu atu altera, importante mak tribunal nia desizaun hau labele komentariu saida mak Ministru Interior dehan, importante dehan inkonstitusional aplika ka lae maibe hau labele deklara ida nee,” katak PTR.
Prezidente Tribunal Rekursu, Afonso hatete nia la fo komentariu kona-ba deklarasaun husi Tribunal maibe husu atu lee deit desizaun.
“Hau labele deklara saida mak tribunal deside, agora importante imi lee desizaun ida nee mak hau hatoo, hau labele komentariu desizaun orsida hau mak halo fali krime, ida nee regra prosesual,” dehan nia.
Liga ho assuntu nee Ministru Interior (MI), Francisco da Costa Guterres informa, sei la anula no la biban halo revizaun ba Diploma Ministeriu Interior iha artigu balu neebe Tribunal Rekursu deklara inkonstitusional kona-ba rekrutamentu ajente Polisia Nasional Timor-Leste (PNTL) foun tinan 2025.
“Hau la anula, despaixu lao nafatin, so artigu balu neebe tribunal dehan inkonstitusional nee mak la tama, maibe restu nee kontinua lao, tanba temi parsialmente deit, querdizer restu nee lao nafatin, iha deit asunto rua ka tolu mak labele”, Ministru nee hatan ba jornalista sira iha Palasiu Governu, kuarta (14/01).
Ho desizaun nee, Ministru nee deklara mantein ho diploma refere no sei la halo revizaun ba artigu balu neebneebe hodi kria kriteria balu iha rekrutamentu refere.
Ministru dehan, la persiza ona halo revizaun, tanba prosesu rekrutamentu nee lao tiha ona. durante nee la lao tuir, tanba buat nee iha tribunal entaun prontu PNTL lao tuir deit regras jeral, la uza regras ida nee, tanba hodi hein desizaun tribunal.
“Desizaun tribunal sai tiha ona prontu, ba ami laiha mudansa buat ruma. Ita la persiza halo alterasaun, tanba durante nee regras sira nee ita la aplika. Tanba durante nee provedor PDHJ hatama tiha tribunal entaun ami la uza regras sira nee”, nia deklara.
Governante nee hateten, durante prosesu rekrutamentu kandidatu polisia foun la aplika kriteria nee hodi hein desizaun tribunal nian, maibe desizaun tribunal deklara inkonstitusional prontu nee la ezekuta.
Membru Governante nee dehan sira la uza artigu sira nee ida, tanba prevene tiha ona katak, PDHJ hatama ba nee se uza artigu nee nafatin maka lao too dalan klaran tribunal deklara inkonstitusional revia hotu fila-fali, entaun diak liu la uza artigu sira nee, la uza, lao tuir regras jeral tau iha neeba, entaun los ona.
Ministru nee esplika, kriteria sira nee durante nee la aplika, tanba kuidadu tebes, se lae desizaun tribunal sai mak sei muda hotu prosesu nee durante tinan tomak.
Molok nee, Tribunal Rekursu liu husi plenaria deklara inskontituisionalidade ba pedidu fiskalizasaun abstrata husi Provedoria Direitu Humanus no Justisa (PDHJ) kona-ba Diploma Ministeriu Interior neebe hatur kriteria balu iha vaga rekrutamentu ajente Polisia Nasional Timor Leste (PNTL) tinan 2025.
(eme)
