DILI, STLTIMORLESTE.com – Prezidente Tribunal Rekursu (PTR), Afonso Carmona hamutuk ho estrutura Tribunal Rekursu presta omenajen ba saudoza Nelia Maria Madalena da Silva, neebe hakotu iis iha loron Domingu (16/11/2025).
Prezidente Tribunal Rekursu, Afonso Carmona hatete, saudoza ema diak no ema neebe pasensia, maibe nia laiha ona, hanesan Prezidente Tribunal Rekursu sente lakon.
“Ita iha ligasaun diak, nia ema neebe mos rezistensia, entaun durante nee ami sempre iha ligasaun neebe diak, entaun ho asidente atakasaun nee, hanesan Prezidente Tribunal Rekursu ita sente lakon ema diak. Ita hanoin situasaun nee aumenta grave,” dehan Carmona hafoin presta omenajen ba falesimentu espoza Ministru Justisa, Sergio Hornai iha nia rezidensia Ai-Mutin.
Tuir PTR, kuandu sira ho Ministru Justisa (MJ) iha Singapura haree ema komesa tau parajen iha facebook saudoza Nelía nia foto tau DEP. No haree MJ iha aviaun laran komesa hatudu oin triste. Sente katak lakon potensia ida, espera bele fo korajem no forsa ba iha MJ.
Entretantu saudoza Nelia Maria Madalena da Silva (naran estimada Nonoi) moris iha Baukau, iha loron 22 Junhu 1975. Nia oan husi Manuel da Silva (falecidu) no Paulina da Costa Soares (falecida). Saudosa nuudar oan dalima husi maun-alin sira nain sia.
Saudosa remata nia estudu prinsipál iha Salesiano Dom Bosco Baukau, depois kontinua atu hetan lisensatura iha Akademia Keuangan dan Perbankan (AKABA) iha Bali, Indonezia, iha tinan 1997.
Durante nia moris, saudosa mos partisipa ativamente hanesan membru juradu iha organizasaun RENETIL, ho kodigu Wen, iha departamentu AGIPRO, rejiaun Aitana, husi tinan 1995.
Saudosa hakotu iis iha Hospital Guido Valadares, iha loron 16 Novembru 2025, hodi husik hela nia kaben Sergio Hornai no oan nain lima.
Saudoza komesa nia kareira profisional hanesan funsionaria iha CARITAS Baukau, husi tinan 1999 too 2005.
Depois, kontinua hanesan funsionaria publika iha Ministeriu Obras Publicas hahu husi tinan 2008 too ohin loron nia hakotu iis. Durante nia servisu, saudosa asumi kargu hanesan Teknika Profisional iha Diresaun Nasional no Aprovisionamentu.
Jornalista: Terezinha De Deus
Editora: Carme Ximenes
