DILI, STLTIMORLESTE.com – Prezidente Tribunal Rekursu (PTR), Afonso Carmona relata preparasaun instalasaun Supremu Tribunal Justisa ba Prezidente Republika (PR), Jose Ramos Horta.
Bainhira remata hasoru malu, Prezidente Tribunal Rekursu, Afonso Carmona ba jornalista sira iha Palasiu Prezidensial Nikolao Lobato, Bairo Pite, Kinta nee (12/06/2025) hatete, ohin mai Palasiu Prezidensial hodi relata preparasaun ba instalasaun Supremu Tribunal Justisa ba Prezidente Republika Jose Ramos Horta.
“Ohin hau marka prezensa iha nee liga ho asuntu neebe iha tempu diskursu iha tomada de pose hau dehan instalasaun Supremu Tribunal Justisa, tanba nee dezde inisiu Prezidente hakarak harii tan, tanba nee ohin mai marka prezensa atu prepara preparasaun ba instalasaun Supremu Tribunal Justisa ho faze inisiu ita prepara dia 30 nee ita hahu ho seminariu ida konaba instalsaun supremu Trinbunal justisa iha Tribunal,” dehan PTR.
Tanba nee ohin hatoo ba Prezidente kona-ba preparasaun nee dia 30 Junhu serimonia boot ida ligadu rekolha informasaun ka opinaun publiku para Supremu Tribunal Justisa tenke harii ou lae, maibe hahu ho informasaun publiku.
“Hau mai nee atu fo hatene ba Prezidente konaba ida nee, no prezidente dezde inisiu nia dehan nia apoiu, tanba nee buat hotu sei lao no sei akontese iha dia 30 Junhu nee ho seminariu, depois tuir mai mak ita sei prepara haree ba lejislasaun neebe sai obstaklu ba preparasaun nee ho rekursu umanu neebe ita iha oinsa ita prepara sira prienxe ba vaga sira nee, nee Julhu nia laran mak sei koalia, maibe iha Julhu nia laran sei realiza seminariu ida nee mak hau hatoo,” katak Prezidente Tribunal Rekursu.
Aleinde oinsa prosesu ba kazu pendente iha Tribunal Rekursu, hatan ba kestaun nee PTR dehan, kazu pendente laos projetu neebe remata iha fulan ida ka rua, maibe prosesu kontinua lao.
“Kazu pendente, hau hatete beibeik nee laos projetu neebe dehan hotu iha fulan ida ka fulan rua, kazu pendente liga ho kazu sira neebe mak prosesu lao hela,” dehan PTR.
Nia hatutan, nia seidauk simu dadus husi ofisial justisa, tanba nee la hatene kazu pendente iha Tribunal Rekursu hira? Bainhira simu ona dadus mak bele fo sai ba publiku katak kazu neebe pendente numeru hanesan nee? Numeru ida nee mak rezolve ona no sei hela hanesan nee.
“Kazu pendente signifika katak laos para, pendente katak prosesu lao hela, neebe hau hanoin kazu pendente lao hela, tanba nee hau sei koalia iha dia 30 Julhu mai tanba ofisial sira iha tribunal seidauk relata tanba sira relata kada fulan, nunee ita hatene fulan nee rejolve hira no rejistu hira iha fulan klaran sira nee imi husu hau labele resposta tanba ita koalia kotu kotu,“ hakotu nia.
(eme)
