DILI, STLTIMORLESTE.com – Jurista Timor oan konsidera katak, povu balu seidauk sente justisa, tanba Tribunal seidauk harii besik ba sira.
“Presiza harii ona Tribunal iha munisipiu sira, no ida nee politika Governu nian neebe diak mak ida nee, signifika katak lori justisa hakbesik ba povu, tanba povu balu seidauk sente justisa,” dehan Jurista Fernando da Costa ba STL iha Kaikoli, Sesta (12/09/2025).
Nia esplika, dala ruma Tribunal dook husi publiku neebe hela iha area rural sira labele asesu mai iha Tribunal, ema halo aktu ruma hasoru sira dala ruma sira labele aprezenta iha Tribunal, tanba distansiamentu.
“Tempu ona atu harii Tribunal besik ba iha povu atu sira bele sente justisa nee oinsa, se lae sira kontinua eziji dehan la hetan justisa, tanba sira sente katak justisa dook hela husi sira,” dehan nia.
Nia argumenta, planu Governu tuir lo-loos aumenta mos numeru rekursu umanus ba setor justisa, tanba ohin loron rekursu umanus sei menus, kauza husi ida nee halo prosesu pendente kontinua aas.
Iha fatin ketak, Jurista Sergio Dias Quintas dehan, harii Tribunal iha munisipiu sira hodi hatudu ba publiku katak lori justisa hakbesik ba sira, no mos ajuda hodi redus kazu pendente neebe iha.
“Hau hanoin harii Tribunal iha munisipiu, primeru mak lori justisa hakbesik ba iha povu, no segundu redus kazu pendente neebe iha,” dehan nia.
Nia fundamenta, prosesu pendente kontinua aas tanba prosesu balu Tribunal notifika parte sira atu mai tuir julgamentu maibe ho distansia neebe dook sira la mai ida, ida nee mos kauza ba prosesu pendente kontinua aas.
Tanba nee mak harii Tribunal iha munisipiu sira sai mos hanesan meius neebe redus kazu pendente.
Jornalista: Terezinha De Deus
Editor: Xisto Mendonça
