DILI, STLTIMORLESTE.com – Husi media sosial, publiku kestiona dezenhu Aeroportu Internasional Nicolau Lobato, hatan ba kestaun nee Primeiru Ministru (PM) Kay Rala Xanana Gusmão hatete, tekniku husi neebe mak koalia aat dezenhu husi IX Governu.
Primeiru Ministru Kay Rala Xanana Gusmão hatoo kestaun nee ba jornalista sira bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nikolao Lobato, Bairo Pite, Kinta (22/05/2025).
Publiku kestiona ona dezenhu Aeroportu Internasional Nikolao Lobato katak ladun diak, hatan ba kestaun nee, PM hatete, dezenhu mak ladun diak tanba sa la diak.
“Tanba sa la diak, la diak nee iha saida,” katak nia.
Publiku hatete katak dezenhu anterior nee diak liu dezenhu IX Governu, hatan ba kestaun nee Primeiru Ministru dehan dezenhu anterior diak liu ka ou kapaas tebes, pozisaun Toremak la diak neebe pozisaun Tore nee tau iha kotuk ka oin ka tau iha pista.
“Dezenhu anterior diak liu ka ou kapaas tebes, pozisaun Tore mak la diak neebe pozisaun Tore nee tau iha kotuk ka oin ka tau iha pista, ou kapaas tebes nee tekniku mai husi neebe, sira neebe hatete dezenhu la diak nee tekniku mai husi neebe, imi imprensa investiga imi fo sai tiha problema mai hau husu imi tekniku neebe koalia la diak nee mai husi neebe, sira halo ona dezenhu iha rai seluk ka iha neebe los para ita haree katak balansu buat sira nee hotu, ou tanba tore entaun hasai tiha tore ka tore mak sala kapaas tebes,” katak PM Xanana.
“Dezenhu ida uluk para furak ida osan mak la too ida dezenhu ida seluk nee furak para mate osan la too nee mak ami halo dezenhu aat ida para osan nee bele tama tanba fundu petroliu mos menus tiha ona,” dehan PM Xanana.
Foin lalais Governu halo ona lansamentu fatuk dahuluk bainhira mak implementa projetu nee, hatan ba kestaun nee Primeiru Ministru ho halimar hatete implementa kala 2038 karik.
Nia hatete, karik Governu anterior nee halo ona lansamentu premeiru pedra entaun hatudu took primeira pedra neebe sira asina nee.
Foin lalais 20 Maiu IX Governu Konstitusional liu husi Primeiru Ministru (PM), Kay Rala Xanana Gusmão halao lansamentu primeira pedra ba dezenvolvimentu no expansaun Aeroportu Internasional Prezidente Nicolau Lobato.
Dezenvolvimentu ho expansaun Aeroportu Internasional Prezente Nicolau Lobato sei garante korredores ba transporte aereu modernus hodi liga Díli ba kapitais rejionais no integra Timor Leste ho forma neebe efikaz liu iha sistemas rejionais no globais. Aumezmu tempu, nee permite Governu reforsa pozisaun Timor Leste nian iha ASEAN no iha rejiaun Azia-Pasífiku enjeral.
Governu labele garante dezenvolvimentu inkluzivu no sustentavel bainhira la iha sistema infraestruturas nebe solidu no integradu.
Projetu nee finansiadu husi Governu Timor Leste, ADB, Ajensia Kooperasaun Internasional Japaun (JICA) no Departamentu Negósiu Estranjeiru no Komersiu (DFAT) Australia nian, projetu ida nee inkorpora kompromisu metin Governu nian ba integrasaun rejional, dezenvolvimentu sustentavel no prosperidade ba tempu naruk.
(eme)
