DILI, STLTIMORLESTE.com – Diretora Medisina Veternaria Ministeriu Agrikulta Peskas Pekuaria no Floresta (MAPPF), Joanita Bendita da Costa Jong husu ba publiku tenke koopera iha atividade imunizasaun ba moras rabies, tanba daudaun nee numeru kazu asu ho virus no moras rabies aumenta ba beibeik.
Nia husu ba publiku tomak atu ho konsensia koopera ho MAPPF iha estabelesimentu atividade imunizasaun ba moras rabies nian, tanba kazu moras rabies daudaun nee aumenta ba beibeik, liu-liu iha area fronteira hanesan Oekusi, Bobonaro no Kovalima.
“Iha asu balun neebe mak ami nia ekipa la konsege vasina, tanba asu nain sira mak lakohi autoriza, maske ami nia funsionariu sira hein atu fo imunizasaun, maibe nain mak lakohi duni atu fo imunizasaun, tanba nee mak kazu nee sae makaas,” hatete Diretora Medisina Veternaria Ministeriu Agrikutura Peskas Pekuaria no Floresta (MAPPF), Joanita Bendita da Costa Jong ba jornalista sira iha Novu Turizmu Díli, Tersa (18/10/2024).
Nia esplika, ho numeru kazu asu pozitivu moras rabies neebe mak daudaun rejistu aas iha muinsipiu rua Maliana, Kovalima inklui Enklave Oekusi nee mak medisina veternaria nee husu ba publiku atu koopera ho ekipa imunizasaun neebe mak daudaun nee lao iha teritoriu laran, atu fo imunizasaun ba asu sira neebe mak komunidade sira hakiak atu nunee bele evita ezistensia moras rabies iha rai laran.
Tuir nia kazu moras rabies neebe daudaun nee rejistu ona iha Medisina Veternaria MAPPF hamutuk nain 54.
(jen)
