DILI, STLTIMORLESTE.com – Ministru Justisa (MJ), Sergio Hornai hatete, rai Estadu balu neebe sei abandona hela, ida nee sei administra husi Governu.
“Rai Estadu neebe abandona la iha propretariu signifika katak nee administra husi Governu, tanba iha lei numeru 13/2017 hateten katak, hahu husi loron 7 fulan Dezembru tinan 1975 too iha 25 Outubru tinan 1999 rai sira ema estranjeriu nian uluk, tantu iha Portugues no Indonezia nia tempu, no okupasaun Japaun nian karik iha, sei regulariza liu husi rejistu perdial,” dehan MJ, Sergio ba jornalista sira, iha Kaikoli, Dili, Kinta (09/10/2025).
Nia dehan, rejistu perdial nee sei halao atividade liu husi servisu levantamentu kadastral, tuir dekretu lei 75/2022 koalia kona-ba informasaun kadastral nian.
Maibe tenke halo nia artikulasaun ba iha lei numeru 13/2017 no mos ba iha rejime juridiku titularidade, no mos ba iha lei numeru 8/2027 konaba eispropresaun No eispropreisaun nee kuandu iha rai privadu sira neebe afetadu, maibe hanusa maka bele rekonese sira hanesan nain atu halo eispropreisaun.
Tanba Diresaun Terras Propriedade liu husi servisu Nasional no mos servisu diresaun kadastrais, halo apresiasaun ba dokumentu hotu neebe deklarante sira aprezenta ba iha Diresaun Jeral konforme lei numeru 13, no mos numeru 1/2023 kona-ba reklamasaun sira.
“Se deklarante liu nain ida katak, iha ona rai disputa tenke haruka fali ba iha Komisaun Terras Propriedade neebe estabelese ho dekretu lei numeru 5/2020 halo kriasaun ba Komisaun atu bele hare, fo rekonesementu bele rai nee tama ba iha dominiu privadu Estadu rai Estadu, ka dominiu partikular nian,” dehan nia.
Iha fatin ketak, Komunidade Suku Komoro, Atansio dos Santos dehan, governu presiza hadia rai sira neebe abandona, hodi investe osan ba Estadu.
“Se rai estadu nian abandona hela, hanoin kria planu atu hadia didiak bele fo fali ba iha populasaun neebe hakarak arendamentu atu hatama reseitas ba Estadu,”dehan nia.
Jornalista: Terezinha De Deus
Editora:Carme Ximenes
