DILI, STLTIMORLESTE.com – Maizumenus tuku 9:30 akontese ahi han Merkadu Taibesi, uma hirak neebe iha areadores Merkadu Taibesi ahi han motuk, tanba rai fali Fogetis ho mina rai iha uma laran.
Reprezentante Prezidente Autorida Munisipiu Dili, Gaspar da Silva dehan, governu liu husi Autoridade Munisipiu Díli too iha fatin akontese insendiu, maibe tuir informasaun katak, negosiante sira tau petasan ka Fogetis iha uma laran hamutuk ho Mina rai, entaun sira sunu lilin depois kona sasan hirak nee rezulta ahi han motuk uma sira iha Merkadu Taibesi nia laran.
“Fogetis estadu bandu, ita hanoin fatin nee sira uza faan sasan, maibe sira tau petasan ou fogetis iha laran, depois halo ahi han motuk uma sira, sasan neebe polisia bandu sira lori mai hodi rai, ida nee kontra ona regras sira nee,” hatete Gaspar ba jornalista sira iha Iha Merkadu Taibesi, Tersa (19/11/2024).
Nia esplika, governu sei foti desizaun forte para sei la autorizaun negosiante sira lori sasan ilegal sira hanesan petasan ou Fogetis mai faan iha Merkadu laran.
“Konsekuensia ai han uma mak ida nee, labarik estudante sira lakon sira nia diploma, sertidaun batizmu no dokumentu sira seluk, tanba sira rasik la kumpri regras sira neebe iha,” nia informa.
Iha fatin hanesan, Vitima ba insendiu iha Merkadu Taibesi, Lidia Guterres esplika, ahi han tanba sira sunu lilin, tanba nee rezulta ahi han motuk uma iha areador Merkadu Taibesi nian.
“Ohin dadersan estudante sira mak sunu lilin, maibe haluha hodi hamate, entaun kala ahi nee ba han ropa sira neebe tara nee, depois mak lakan boot, rezulta uma hirak nee motuk no sasan uma laran labele salva, sasan hanesan diploma, sertidaun no dokumentus seluk, nomos sasan foos, mina, ropa no seluk tan labele salva hotu,” nia esplika.
Nunee mos Presidente Autoridade Protesaun Sivil (APC), Jesuino da Reis Matos Carvalho hatete, insendiu neebe akontese iha Merkadu Taibesi, APC mai halo levantamentu dadus uma hira mak ahi han, maibe ida nee laos sira nia uma rasik, sira mai hela iha nee hodi faan sasan, tanba nee APC apoiu emerjensia ba sira.
(jen)
