DILI, STLTIMORLESTE.com – Ministru Justisa deklara katak, Prezidente Republika mak iha kompetensia atu fo indultu, maibe iha rekuzu balu inklui Eis Padre Daschbach tanba razaun idade, sira mos tama iha lista indultu.
Tuir Ministru Justisa, Sergio Hornai katak, ita iha orgaun separasaun poder rona orgaun soberania Estadu nia preokupasaun, rona mos sosiedade sira nia preokupasaun no Prezidente sei halo punderasaun ba sirkunstansia hotu, tanba indultu no komutasaun kompetensia ida neebe ba iha Prezidente Republika atu halo desizaun politika konstituisional ba rekuzu sira neebe simu ona pena ka desizaun husi Tribunal neebe la iha ona rekursu. No Eis Padre Daschbach mos tama hotu iha lista.
“Tanba razaun idade ita hotu fo, maibe Prezidente sempre toma konsiderasaun hanesan proponente mai husi nia familia, Ministeriu Justisa, Servisu Prizional sempre aprezenta bele mos tanba idade, tanba ita la eziste pena perpetua no pena de morte, ida nee sai hanesan razaun fundamental,” dehan Ministru Justisa ba jornalista sira, depois de partisipa Icar bandeira iha Palasiu Prezidensial, Tersa (20/05/2025).
Ministru Justisa hatutan, Padre Daschbach nia lista tama hotu iha neeba, maibe Ministeriu Justisa seidauk iha dekreta ida husi Prezidente kona-ba indultu, maibe Eis Padre Daschbach mos sai hanesan proponente ida mai husi prizaun, haree ba nia idade tanba nia mos moras hela.
Reforsa, laos ba Eis Padre Daschbach deit, maibe ba mos rekuzu sira neebe idade ona tama iha kualifikadu neeba, tanba iha ona desizaun difinitiva husi Tribunal, nia hetan ona pena ba komportamentu neebe komete iha neeba.
Iha fatin ketak, Akademiku UNTL, Sebastiao dos Santos dehan, rekuzu sira mos iha direitu atu hetan indultu, kuandu sira kumpri ona regra sira neebe iha.
“Hau hanoin sira bele hetan indultu kuandu sira kumpri ona kastigu balu, maibe importante mak sai iha liur labele halo tan aktu ida neebe antes nee sira halo ona,” dehan nia.
Hatutan tan, ema hotu sempre halo sala, maibe koko atu sala ida neebe halo hodi lori ba iha prizaun, sai mai iha liur labele halo tan, no hatudu hahalok diak iha sosiedade.
Tuir dadus neebe iha, oras nee daudaun dadur iha prizaun tolu hanesan Bekora, Suai no Gleno akomula dadur hamutuk atus neen neen nulu resin sia (669), numeru guarda prizional foin lalais rekruta tan atus ida, maibe iha administrativa nia prosesu foin mak hetan hitu nulu rersin rua (72), falta rua nulu resin (28) neebe mak reanunsia hela, no total agora provizoriu hela besik atus tolu resin.
(jen)
