BAUKAU, STLTIMORLESTE.com – Deputadu Virgílio Pereira hateten, prosesu ba projetu reabilitasaun estrada urbana Baukau Vila seidauk iha tenderizasaun, tanba nee husu Baukau oan kalma hein projetu nee.
“Buat nee iha hela prosesu nia laran tuir loloos nee labele divulga buat neebe seidauk serteja, PAM terlanjur dehan iha loron 20-21 nee peletakan batu pertama, sedangkan buat nee iha hela prosesu nia laran tenderizasaun deit seidauk hanusa mak ita brani divulga ba publiku dehan katak, atu halo ona lansamentu fatuk dahuluk,” Deputadu Virgílio Pereira hateten ba STL, liu husi telefone, Kinta (04/12/2025).
Nia sublina, prosesu ba projetu refere faze inisiu hahu prepara husi Ministeriu Obras Publikas (MOP), hafoin MOP dirije ba iha Ajensia Dezenvolvimentu Nasional (ADN), hodi ADN verifika no haruka hikas fali iha MOP no MOP kontinua haruka fali ba Konselhu Administrasaun Fundu Infraestrutura (KAFI), hafoin KAFI hetan deside ona mak sei entrega fila fali ba MOP hodi loke tenderizasaun, maibe ida nee seidauk akontese.
Nunee Virgílio konsidera, deklarasaun neebe Prezidente Autoridade Munisipiu Baukau divulga iha media sosial kona-ba projetu reabilitasaun estrada urbana Baukau Vila, sein halo konfirmasaun serteja, maibe divulga ona informasaun.
“Hau rasik mos hanesan Membru Komisaun Infraestrutura lamentavel tebes ho divulgasaun, loloos labele divulga buat neebe seidauk serteja kecuali buat nee tende hotu tiha Ministru fo sai ona data serteja nee bele, mais hau haree fo sai hanesan nee nia impaktu mai too lideransa,” Virgílio komenta.
Nia katak, hanesan reprezentasaun povu Baukau iha Parlamentu Nasional sempre kestiona kondisaun estrada urnaba Baukau Vila iha uma fukun Parlamentu Nasional no iha audensia Orsamentu Jeral Estadu 2026 iha Parlamentu Nasional, Ministru Obras Publikas esplika klaru katak, prosesu ba estrada urbana Baukau Vila hetan ona deside husi KAFI no haruka hikas ona ba MOP atu tenderizasaun iha tempu badak.
“Neebe husu ba povu Baukau tomak kalma akompanha estrada urbana Baukau nian sei halo iha tempu badak, maibe ita hotu akompanha nia prosesu tenderizasaun hotu, Governu anunsiu ona pemenang satu, dua, tiga hafoin mak Ministru deside bainhira mak atu halo lansamentu fatuk dahuluk, neebe ita hotu ho esperansa sei halo iha tempu badak, maibe auguenta hein oituan,” Virgílio enkoraja.
Enkuantu Prezidente Autoridade Munisipiu Baukau, Veneranda Lemos rekoinhese, nia parte divulga informasaun ba publiku katak, iha fulan Novembru 2025 Governu sei lansa fatuk dahuluk ba projetu reabilita estrada urbana Baukau Vila, tanba rona informasaun husi Governu Sentral.
Entretantu estrada urbana Baukau Vila neebe tuir planu atu reabilita hamutuk kilometru 23 kobre husi Vila Antiga too Vila Nova no kontinua too iha area Nagardjo parte Uainiki, maibe too ohin loron Autoridade Munisipiu Baukau seidauk hetan dezenhu ba projetu nee husi Nasional.
Jornalista: Tomas Reis
Editora: Carme Ximenes
